महाराष्ट्र संवाद न्यूज ऑनलाईन- अहिल्यानगर जिल्ह्यामध्ये गोवंशीय जनावरांची कत्तल करणाऱ्या आणि अवैध वाहतूक करणाऱ्यांवर स्थानिक गुन्हे शाखेच्या (एलसीबी) पोलिसांची कारवाई सुरूच असून, संगमनेर शहरात देखील कारवाई करण्यात आली आहे. कादरीनगर परिसरामध्ये कत्तलीच्या उद्देशाने डांबून ठेवलेल्या तब्बल १० गोवंशीय जनावरांची सुटका करण्यात आली असून, या प्रकरणी दोन जणांना ताब्यात घेण्यात आले आहे.
अहिल्यानगर जिल्ह्याचे पोलीस अधीक्षक मुम्मका सुदर्शन यांनी गोवंशीय जनावरांची कत्तल व अवैध वाहतूक करणाऱ्या इसमांचा शोध घेऊन कठोर कारवाई करण्याचे आदेश दिले होते. या आदेशाच्या पार्श्वभूमीवर स्थानिक गुन्हे शाखेचे पोलीस निरीक्षक संतोष मुटकुळे यांनी विशेष तपास पथक तयार केले होते.
हे पथक सोमवारी (दि. २७) संगमनेर शहर पोलीस ठाणे हद्दीत अवैध धंद्यांची माहिती घेत असताना, कादरीनगर गल्ली नंबर ०२ मधील मस्जीदे गौसो रजासमोरील मोकळी जागा आणि म्हसोबा मंदिराजवळ काही जनावरे कत्तलीसाठी बांधून ठेवल्याची गोपनीय माहिती मिळाली.
मिळालेल्या माहितीच्या आधारे पोलिसांनी तात्काळ पंचासमक्ष संबंधित ठिकाणी छापा टाकला. या कारवाईत कत्तल करण्याच्या उद्देशाने डांबून ठेवलेली १० गोवंशीय जनावरे आढळून आली. पोलिसांनी घटनास्थळावरून ३ लाख ४० हजार रुपये किमतीची १० गोवंशीय जनावरे ताब्यात घेतली असून, आदनान असीफ सय्यद (वय २८, रा. देवीगल्ली, मोगलपुरा, संगमनेर) आणि अनस सरवर कुरेशी (वय २४, रा. हावडा ब्रीज, संगमनेर) या दोन्ही संशयितांना ताब्यात घेतले आहे.
या प्रकरणी संगमनेर शहर पोलीस ठाण्यात महाराष्ट्र पशुसंरक्षण अधिनियम १९९५ (सुधारित २०१५) चे कलम ५(अ), ५(ब), ९ तसेच प्राण्यांना निर्दयतेने वागवण्यास प्रतिबंध करणाऱ्या कायद्याचे कलम ३ व ११ नुसार गुन्हा दाखल करण्यात आला आहे. पुढील तपास संगमनेर शहर पोलीस करीत आहेत.
