आमदार अमोल खताळ यांच्या पुढाकाराने संगमनेरकरांना उपमुख्यमंत्र्यांकडून ‘दिवाळी शिधा’चे मोठे गिफ्ट

महाराष्ट्र संवाद न्यूज ऑनलाईन-
तालुक्यात उद्भवलेल्या भीषण दुष्काळी परिस्थितीच्या पार्श्वभूमीवर शेतकरी आणि सर्वसामान्य नागरिकांना मोठा दिलासा देणारा निर्णय घेण्यात आला आहे. सणासुदीच्या काळात दुष्काळग्रस्त कुटुंबांची दिवाळी अंधारात जाऊ नये या मानवतेच्या भावनेतून उपमुख्यमंत्री एकनाथ शिंदे यांच्या माध्यमातून तालुक्यातील गरजू कुटुंबांसाठी ‘दिवाळीचा शिधा’ उपलब्ध झाला आहे. शिवसेनेच्या कार्यकर्त्यांमार्फत दुष्काळाची सर्वाधिक झळ बसलेल्या ग्रामीण भागातील घराघरांपर्यंत हा शिधा त्वरित पोहोचवला जाणार असल्याची माहिती आमदार अमोल खताळ यांनी दिली.
आमदार खताळ यांच्या कार्यालयाकडून प्रसिद्धीस देण्यात आलेल्या माहितीनुसार तालुक्यातील दुष्काळ, पिण्याचे पाणी, जनावरांचा चारा, रोहयोची कामे आणि शेतकऱ्यांच्या थकबाकीच्या प्रश्नांवर प्रशासकीय नियोजन यासंदर्भात सविस्तर माहिती दिली.
टंचाई आढावा बैठकांनुसार ज्या गावांमध्ये पाण्याची तीव्र टंचाई निर्माण झाली आहे, तिथे तातडीने पाण्याचे टँकर सुरू करण्याचे कडक निर्देश अधिकाऱ्यांना देण्यात आले आहेत. टँकरच्या मागणीत कोणतीही दिरंगाई खपवून घेतली जाणार नाही असा इशारा देत, येत्या काळात जलस्रोत आणि उपलब्ध पाणीसाठ्याचे सूक्ष्म नियोजन करून नागरिकांची पाण्यासाठी होणारी वणवण थांबवण्यावर भर दिला जात असल्याचे त्यांनी स्पष्ट केले.
तालुक्यातील जलजीवन मिशन आणि इतर पाणीपुरवठा योजनांची पाऊणशे टक्क्यांहून अधिक कामे पूर्ण झाली असून, उर्वरित अपूर्ण कामे प्राधान्याने मार्गी लावण्यासाठी उपमुख्यमंत्री एकनाथ शिंदे यांच्याकडे विशेष पाठपुरावा सुरू आहे. केवळ टँकरवर अवलंबून न राहता स्थानिक पातळीवर विहिरींचे खोलीकरण, नादुरुस्त पाइपलाइनची डागडुजी आणि लहान-मोठे जलस्रोत विकसित करून कायमस्वरूपी उपाययोजना करण्यावर आमदारांनी भर दिला.
या संकटसमयी शेतकरी बांधवांच्या पशुधनाचा प्रश्न ऐरणीवर आला असून ‘मनरेगा’ अंतर्गत चारा उपलब्ध करून देण्यासाठी शासनाने मंजुरी दिली आहे. त्यामुळे पशुधनासाठी पिण्याचे पाणी आणि चाऱ्याचे नियोजन प्रशासनामार्फत वेगाने सुरू आहे. दुष्काळाच्या काळात शेतकऱ्यांना आपल्या जनावरांचा सांभाळ करताना आर्थिक चटके बसू नयेत यासाठी सर्व संबंधित यंत्रणांना सतर्क राहण्याचे आदेश आमदार खताळ यांनी दिले आहेत.