सोमवार दि. २५ मार्च, संगमनेर
गुरुवारी (२८ मार्च) संगमनेरमध्ये शिवजयंती उत्सव मोठ्या जल्लोषात साजरा केला जाणार असून दरवर्षीप्रमाणे तिथीनुसार संगमनेर नगर परिषदेच्या प्रांगणातून शिवसेनेच्या हिंदू हृदय सम्राट सरसेनापती बाळासाहेब ठाकरे मित्र मंडळाच्या वतीने पारंपारिक भव्य दिव्य मिरवणूक काढली जाणार आहे. या मिरवणुकीला संगमनेरकरांनी मोठ्या संख्येने उपस्थित राहण्याचे आवाहन शिवसेनेचे माजी शहरप्रमुख अमर कतारी यांनी केले आहे.
गेल्या काही दिवसापासून संगमनेरात घडलेल्या अनुचित प्रकारांमुळे येथील शांततेला गालबोट लागले आहे. या पार्श्वभूमीवर प्रशासन सतर्क झाले असून प्रशासनातील अधिकाऱ्यांसह लोकप्रतिनिधींनी संगमनेरकरांना शांततेचे आवाहन केले आहे. त्यातच लोकसभा निवडणुकीची आचारसंहिता सुरू असल्याने योग्य ती सतर्कता बाळगत मिरवणूक काढली जाणार आहे.
सायंकाळी सहा वाजता मिरवणुकीला प्रारंभ होणार असून या मिरवणुकीत उंट, घोडे, ढोलताशा पथक, डीजे साऊंड सिस्टिम, बँड पथक तसेच छत्रपती शिवाजी महाराजांचा अश्वारूढ पुतळा आदींचा मिरवणुकीत समावेश असेल. शिवसेनेच्या अंगीकृत संघटनेच्या पदाधिकाऱ्यांनी, कार्यकर्त्यांनी, शिवजयंती उत्सव समिती, संगमनेरकर नागरिकांनी मिरवणुकीत सहभागी होण्याचे आवाहन करण्यात आले आहे.
