बुधवार, दि. १० एप्रिल
नगर अर्बन बँकेच्या कर्ज फसवणूक प्रकरणात अटक केलेल्या संचालक, अधिकारी व कर्जदार यांच्या विरोधात आर्थिक गुन्हे शाखेने न्यायालयात दोषारोपपत्र दाखल केल्याची माहिती उपाधीक्षक अमोल भारती यांनी दिली. संगमनेरचा बडा कर्जदार आरोपी व सध्या अटकेत असलेल्या अमित पंडित यांच्यासह दहा जणांचा यामध्ये समावेश आहे.
सुमारे आठ हजार पानांच्या या दोषारोप पत्रात अटक केलेल्या आरोपींच्या गुन्ह्याचे पुरावे आर्थिक व्यवहाराची माहिती आणि फॉरेन्सिक अहवालाचा समावेश असल्याचे सांगण्यात आले. ९० दिवसांच्या मुदतीच्या आत हे दोषारोपपत्र न्यायालयात दाखल करण्यात आले आहे.
नगर अर्बन बँकेचे माजी संचालक राजेंद्र गांधी यांच्या फिर्यादीवरून कोतवाली पोलीस ठाण्यात या कर्ज फसवणूक प्रकरणाचा गुन्हा दाखल झाला आहे. सध्या या गुन्ह्याचा तपास आर्थिक गुन्हे शाखेकडून सुरू असून आर्थिक गुन्हे शाखेने या संपूर्ण घोटाळ्याचे फॉरेन्सिक ऑडिट करून घेतले. तब्बल २९१ कोटी रुपयांच्या या घोटाळ्यात तब्बल १०५ जणांवर फसवणुकीचा ठपका ठेवण्यात आला आहे. त्यापैकी दहा जणांना आत्तापर्यंत आर्थिक गुन्हे शाखेने अटक केली आहे. यात संगमनेरमधील अमित पंडित याचा देखील समावेश आहे.
या घोटाळ्याप्रकरणी दिवसेंदिवस नवी माहिती समोर येत आहे. फॉरेन्सिक अहवालात देखील आरोपी विरोधात गंभीर स्वरूपाचे आक्षेप नोंदविण्यात आले. बँकेतील कर्ज प्रकरणांमध्ये कर्जदारांकडून कर्जाच्या रकमेच्या गैरवापर, कर्जाच्या रकमेतून जुन्या कर्जाच्या रकमा भरणे, काही रक्कम संचालक अथवा त्यांच्या नातेवाईकांच्या खात्यात जमा झाल्याचे समोर आले आहे. याशिवाय बँकेच्या शाखेअंतर्गत व्यवहारासाठी असलेल्या खात्यांमधून कर्जदारांच्या खात्यात रकमा देखील वर्ग झाल्याचे तपासात समोर आले.
न्यायालयात दोषारोप दाखल झालेल्या १० आरोपींमध्ये यांचा आहे समावेश…
कर्जदार अमित वल्लभराय पंडित, संचालक मनेष दशरथ साठे, अनिल चंदुलाल कोठारी, अशोक माधवलाल कटारिया, सीए शंकर घनश्यामदास अंदानी, शाखाधिकारी प्रदीप जगन्नाथ पाटील, राजेंद्र शांतीलाल लुणीया, अतिरिक्त मुख्य व्यवस्थापक मनोज वसंतलाल फिरोदिया, कर्जदार प्रवीण सुरेश लहारे, व अविनाश प्रभाकर वैकर.
