शनिवार, दि.२० एप्रिल
आपल्या आदर्श कारभारातून देशातील सहकारासाठी मार्गदर्शक ठरलेल्या सहकार महर्षी भाऊसाहेब थोरात सहकारी साखर कारखान्याच्या सन २०२३-२०२४ च्या गळीत हंगामाची सांगता सोमवारी (दि.२२ एप्रिल) सकाळी ९ वाजता माजी मंत्री आमदार बाळासाहेब थोरात यांच्या पत्नी कांचनताई थोरात, माजी आमदार डॉ. सुधीर तांबे, कारखान्याचे अध्यक्ष बाबा ओहोळ यांच्या उपस्थितीत होणार असल्याची माहिती देण्यात आली आहे.
यावेळी आमदार सत्यजित तांबे, माधवराव कानवडे, दुर्गाताई तांबे, रणजीतसिंह देशमुख, बाजीराव खेमनर, कॅन्सरतज्ञ डॉ. जयश्रीताई थोरात, काँग्रेसचे शहराध्यक्ष सोमेश्वर दिवटे यांच्यासह विविध संस्थांचे पदाधिकारी व मान्यवर उपस्थित राहणार आहेत.
दिवंगत सहकार महर्षी भाऊसाहेब थोरात यांनी बिजारोपण केलेल्या साखर कारखान्याची आमदार बाळासाहेब थोरात यांच्या मार्गदर्शनाखाली दिशादर्शक वाटचाल सुरू आहे. कारखान्याने ऊस उत्पादक, सभासद, शेतकरी आणि कामगारांचे हित जपत ऊस उत्पादक शेतकऱ्यांना सातत्याने विक्रमी भाव दिला आहे.
यावर्षी दुष्काळी परिस्थिती असताना देखील कारखान्याने दहा लाख मेट्रिक टनापेक्षा अधिक ऊस गाळपाचा उच्चांक साधला आहे.
या कार्यक्रमासाठी शेतकरी, ऊस उत्पादक सभासद व सेवानिवृत्त कर्मचारी यांनी मोठ्या संख्येने उपस्थित राहावे, असे आवाहन कार्यकारी संचालक जगन्नाथ घुगरकर व संचालक मंडळांने केले.
अमृत उद्योग समूहातील सेवानिवृत्त कर्मचारी संघ कार्यालयाचे उद्घाटन…
गळीत हंगाम सांगता समारंभादरम्यान अमृत उद्योग समूहातील सेवानिवृत्त कर्मचारी संघ कार्यालयाचे उद्घाटन काँग्रेस विधिमंडळ पक्षनेते आमदार बाळासाहेब थोरात व त्यांच्या पत्नी कांचनताई थोरात यांच्या हस्ते, माजी आमदार डॉ. सुधीर तांबे यांच्या उपस्थितीत व कारखान्याचे अध्यक्ष बाबा ओहोळ यांच्या अध्यक्षतेखाली होणार आहे.
