महाराष्ट्र संवाद न्यूज ऑनलाईन- सन २०२६-२०२७ या गळीत हंगामात गाळपासाठी येणाऱ्या उसाला प्रतिटन ३२०० रुपये पहिली उचल देण्याचा महत्त्वाचा निर्णय सहकारमहर्षी भाऊसाहेब थोरात सहकारी साखर कारखान्याने घेतला आहे. कारखान्याचे व्हाईस चेअरमन पांडुरंग पाटील घुले यांनी याबाबतची अधिकृत घोषणा केली.
काँग्रेसच्या राष्ट्रीय वर्किंग कमिटीचे सदस्य तथा राज्याचे माजी मंत्री बाळासाहेब थोरात यांच्या मार्गदर्शनाखाली कारखाना प्रशासनाने हा शेतकरी हिताचा निर्णय घेतला असून, अल-निनोच्या प्रभावामुळे निर्माण झालेल्या कमी पावसाच्या व दुष्काळी परिस्थितीत यामुळे ऊस उत्पादकांना मोठा आर्थिक दिलासा मिळणार आहे.
या निर्णयाची सविस्तर माहिती देताना व्हाईस चेअरमन पांडुरंग पाटील घुले यांनी सांगितले की, लोकनेते बाळासाहेब थोरात यांच्या दूरदृष्टी नेतृत्वाखाली कारखान्याने नेहमीच तालुक्याच्या सर्वांगीण विकासात मोठे योगदान दिले आहे. प्रशासनातील शिस्त, काटकसर आणि पारदर्शक कारभार यामुळे कार्यक्षेत्रातील तसेच कार्यक्षेत्राबाहेरील शेतकऱ्यांचा थोरात कारखान्यावर नेहमीच दृढ विश्वास राहिला आहे. कारखान्याने सभासद आणि ऊस उत्पादक शेतकऱ्यांच्या हिताला नेहमीच सर्वोच्च प्राधान्य दिले आहे.
यंदा दुष्काळी परिस्थितीचे सावट असतानाही कारखान्याने दिवाळी सणापूर्वी आपल्या कार्यक्षेत्रातील ऊस उत्पादकांना प्रतिटन २०० रुपये अनुदान दिले. तसेच कामगारांना २० टक्के बोनस आणि ३० दिवसांचे सानुग्रह अनुदान अदा केले. याशिवाय दीपावलीच्या काळात सुमारे २२ कोटी ११ लाख रुपये थेट शेतकऱ्यांच्या बँक खात्यावर वर्ग करण्यात आल्याने संगमनेरच्या बाजारपेठेला मोठी आर्थिक चालना मिळाली होती.
यंदा अल-निनोच्या प्रभावामुळे पावसाचे प्रमाण कमी राहिल्याने शेतकरी संकटात सापडला आहे. अशा प्रतिकूल परिस्थितीत शेतकऱ्यांच्या पाठीशी खंबीरपणे उभे राहण्यासाठी बाळासाहेब थोरात यांच्या मार्गदर्शनाखाली कारखान्याने ३२०० रुपये प्रतिटन पहिली उचल जाहीर केली आहे. या निर्णयामुळे ऊस उत्पादक शेतकऱ्यांमध्ये आनंदाचे आणि समाधानाचे वातावरण निर्माण झाले असून, शेतकऱ्यांनी लोकनेते बाळासाहेब थोरात, व्हाईस चेअरमन पांडुरंग पाटील घुले, सर्व संचालक मंडळ आणि कार्यकारी संचालक जगन्नाथ घुगरकर यांचे अभिनंदन केले आहे.
