महाराष्ट्र संवाद न्यूज ऑनलाईन- बायोसीबीजी प्रकल्प उभारण्यास केंद्र सरकारने सहकारी साखर कारखान्याना दिलेले पाठबळ आत्मनिर्भर भारतासाठी महत्त्वपूर्ण असून, उर्जा क्षेत्रात स्वावलंबी होण्यास प्रकल्पाची निश्चित मदत होईल असा विश्वास जलसंपदा तथा पालक मंत्री राधाकृष्ण विखे पाटील यांनी व्यक्त केला.
पद्मश्री डॉ. विठ्ठलराव विखे पाटील सहकारी साखर कारखान्यातवतीने केंद्र सरकारच्या गोबर्धन योजनेअंतर्गत प्रतिदिनी १६ टन क्षमतेच्या बायोसीबीजी प्रकल्पाचा भूमिपूजन सोहळा जलसंपदा तथा पालकमंत्री राधाकृष्ण विखे पाटील यांच्या उपस्थितीत संपन्न झाला. कार्यक्रमाच्या अध्यक्षस्थानी माजी मंत्री आण्णासाहेब म्हस्के पाटील होते.
यावेळी बोलताना पालकमंत्री राधाकृष्ण विखे पाटील यांनी हा प्रकल्प ऊर्जा क्षेत्रात स्वावलंबी होण्यासाठी आणि देशाच्या ऊर्जा सुरक्षेसाठी अत्यंत महत्त्वपूर्ण असल्याचे सांगितले. शेतातील वाया जाणाऱ्या कचऱ्याचा आधुनिक तंत्रज्ञानाच्या सहाय्याने ऊर्जेमध्ये रूपांतर करून हा प्रकल्प चालवला जाणार असून, या माध्यमातून शेतकऱ्यांसाठी उत्पन्नाचे अतिरिक्त स्त्रोत निर्माण होईल असा विश्वास त्यांनी व्यक्त केला.
कार्यक्रमाचे प्रास्ताविक करताना कारखान्याचे चेअरमन डॉ. सुजय विखे पाटील यांनी, पंतप्रधान नरेंद्र मोदी आणि केंद्रीय सहकार मंत्री अमित शाह यांच्या माध्यमातून सहकारी साखर कारखानदारीला मोठे पाठबळ मिळत असल्याचे नमूद केले. तसेच नव्या प्रकल्पाची उभारणी आणि एकाच हंगामात एक लाख टन ऊसाचे गाळप पूर्ण करून कारखाना राज्यात प्रथम स्थानी राहिल्याची माहिती त्यांनी दिली. याप्रसंगी माजी मंत्री आण्णासाहेब म्हस्के पाटील यांच्या वाढदिवसानिमित्त पाच लाख रुपयांचा धनादेश दुष्काळ सहाय्यता निधीसाठी शासनाकडे सुपूर्त करण्यात आला. सदर कार्यक्रमास कारखान्याचे पदाधिकारी, अधिकारी आणि मोठ्या संख्येने शेतकरी सभासद उपस्थित होते.
