डॉ. सुजय विखे जिल्हा बँकेच्या अध्यक्षपदी, तर उपाध्यक्षपदी रणजितसिंह देशमुख बिनविरोध

महाराष्ट्र संवाद न्यूज ऑनलाईन-
अहिल्यानगर जिल्ह्याच्या राजकारणात परस्परविरोधी विचार आणि राजकीय प्रवाह एकत्र आणत सहकाराच्या माध्यमातून नवी राजकीय समीकरणे जुळविणारे भारतीय जनता पक्षाचे प्रदेश उपाध्यक्ष डॉ. सुजय विखे पाटील यांची अहिल्यानगर जिल्हा मध्यवर्ती सहकारी बँकेच्या अध्यक्षपदी एकमताने निवड झाली आहे, तर उपाध्यक्षपदी रणजितसिंह देशमुख यांची निवड करण्यात आली.
जिल्हा उपनिबंधक मंगेश सुरवसे यांच्या प्रमुख उपस्थितीत गुरुवारी ही निवड प्रक्रिया पार पडली. मुख्यमंत्री देवेंद्र फडणवीस यांच्या मार्गदर्शनाखाली जिल्ह्यातील प्रमुख राजकीय नेत्यांना एका व्यासपीठावर आणण्यापासून ते जिल्ह्याच्या अर्थवाहिनीचे नेतृत्व करण्यापर्यंत डॉ. विखे पाटील यांनी केलेला प्रवास या निवडीच्या निमित्ताने चर्चेत आला आहे.
या निवड प्रक्रियेवेळी पालकमंत्री राधाकृष्ण विखे पाटील, माजी मंत्री बाळासाहेब थोरात, विधान परिषदेचे सभापती प्रा. राम शिंदे यांच्यासह नवनिर्वाचित संचालक मंडळातील सदस्य डॉ. सुजय विखे पाटील, शंकरराव गडाख, रणजितसिंह देशमुख, अक्षय कर्डिले, बिपीन कोल्हे, मोनिका राजळे, राजश्री घुले, करण ससाणे, दत्ता पानसरे, सचिन जगताप, ज्योती प्रकाश शिंदे, प्राजक्त तनपुरे, आशुतोष काळे, अनुराधा नागवडे, संगीता जयंत वाघ, कारभारी जावळे, गणपतराव सांगळे, वैभव पिचड, संजीवनी शिंदे आणि सचिन घुमरे उपस्थित होते.
संपूर्ण जिल्ह्याचे लक्ष लागून राहिलेल्या या निवडणुकीत सहकार क्षेत्रावर प्रभाव असलेल्या विविध राजकीय गटांना एकत्र आणणे आणि सामूहिक नेतृत्वाची भूमिका स्वीकारणे हे प्रमुख आव्हान होते. पालकमंत्री राधाकृष्ण विखे पाटील, माजी मंत्री बाळासाहेब थोरात, माजी मंत्री शंकरराव गडाख आणि सभापती प्रा. राम शिंदे या चार प्रमुख नेतृत्वांमध्ये समन्वय साधण्याची जबाबदारी डॉ. सुजय विखे पाटील यांनी प्रभावीपणे पार पाडली. निवडणुकीत केवळ जागांचे गणित न मांडता त्यांनी विविध भागांतील संचालकांशी संवाद साधला, गैरसमज दूर केले आणि संघर्षाऐवजी चर्चेतून मार्ग काढत ‘सहकार विकास आघाडी’ची बांधणी केली.
२१ जागांच्या या निवडणुकीत विखे, थोरात आणि गडाख यांच्या सहमतीने स्थापन झालेल्या सहकार विकास आघाडीने १७ जागांवर विजय मिळवला होता. त्यानंतर अकोले येथील अपक्ष संचालिका संजीवनी शिंदे यांनी पाठिंबा दिल्याने आघाडीचे संख्याबळ १८ वर पोहोचले. निवडीच्या दिवशी सकाळी झालेल्या बैठकीत सभापती प्रा. राम शिंदे गटाचे संचालक सचिन घुमरे आणि ज्योती प्रकाश शिंदे यांनीही डॉ. विखे आणि देशमुख यांना पाठिंबा जाहीर केला, ज्यामुळे अध्यक्ष व उपाध्यक्षपदाच्या बिनविरोध निवडीचा मार्ग मोकळा झाला.
डॉ. सुजय विखे पाटील यांना विखे पाटील सहकारी साखर कारखान्याच्या अध्यक्षपदाचा आणि संस्थात्मक कामकाजाचा प्रदीर्घ अनुभव आहे. जिल्हा बँक ही ग्रामीण अर्थव्यवस्थेचा कणा असून शेतकरी, विकास सोसायट्या आणि साखर कारखान्यांचे आर्थिक व्यवहार या बँकेशी निगडित आहेत. त्यामुळे आगामी काळात पीककर्ज वितरण, थकबाकी वसुली, बँकेची आर्थिक शिस्त, आधुनिक बँकिंगचा विस्तार आणि सहकारी संस्थांना बळकटी देण्याचे महत्त्वाचे आव्हान नव्या नेतृत्वासमोर असणार आहे.
भाजपचे प्रदेश उपाध्यक्ष म्हणून संघटनात्मक जबाबदारी सांभाळतानाच डॉ. विखे पाटील यांनी जिल्ह्यातील विविध राजकीय नेत्यांना सहकाराच्या एका व्यासपीठावर आणून समन्वयाचा नवा आदर्श निर्माण केला आहे. त्यामुळे ही निवड केवळ पदाची नियुक्ती न राहता जिल्ह्यातील सहकार क्षेत्राच्या नव्या पर्वाची सुरुवात मानली जात असून, अध्यक्ष डॉ. सुजय विखे पाटील आणि उपाध्यक्ष रणजितसिंह देशमुख यांच्या नेतृत्वाखाली बँकेची वाटचाल कशी राहते, याकडे संपूर्ण जिल्ह्याचे लक्ष लागले आहे.