आमदार अमोल खताळ यांनी कुटुंबीयांसमवेत साजरी केली भाऊबीज; बहिणीच्या पाठीशी खंबीरपणे उभे राहणे हाच सणाचा खरा संदेश

महाराष्ट्र संवाद न्यूज ऑनलाईन-
भारतीय संस्कृतीमध्ये भाऊबीज या सणाला विशेष महत्त्व असून बहीण-भावाच्या प्रेमाचे, विश्वासाचे आणि अतूट नात्याचे प्रतीक म्हणून हा सण देशभरात उत्साहात साजरा केला जातो. बहिणीने भावाच्या दीर्घायुष्यासाठी व सुखसमृद्धीसाठी प्रार्थना करणे आणि भावाने बहिणीच्या सुख-दुःखात कायम तिच्या पाठीशी खंबीरपणे उभे राहणे, ही या सणाची खरी शिकवण आहे. बहिणीचे हे पवित्र नाते आयुष्यभर जपले पाहिजे. तिचे संरक्षण करणे, तिला सन्मानाची वागणूक देणे आणि तिच्या स्वप्नांना बळ देणे हे प्रत्येक भावाचे कर्तव्य आहे, असा संदेश आमदार अमोल खताळ यांनी भाऊबीज सणानिमित्त दिला आहे.
शहरातील घुलेवाडी रोड येथील आमदार खताळ यांच्या निवासस्थानी कुटुंबीयांसमवेत भाऊबीज सण मोठ्या उत्साहात साजरा करण्यात आला. यावेळी आमदार खताळ म्हणाले की, भाऊबीज हा केवळ पारंपरिक सण नसून आदर, कौटुंबिक जिव्हाळा आणि सामाजिक बांधिलकी जपण्याचा दिवस आहे. बहिणीच्या आयुष्यात सुरक्षितता, स्वाभिमान आणि आनंद निर्माण करण्यासाठी प्रत्येक भावाने प्रयत्नशील राहिले पाहिजे. बहिणीला केवळ सणाच्या दिवशी शुभेच्छा देण्यापुरते हे नाते मर्यादित न ठेवता, तिच्या प्रत्येक अडचणीत आणि आयुष्यातील महत्त्वाच्या टप्प्यांवर तिच्या पाठीशी खंबीरपणे उभे राहणे आवश्यक आहे. हाच भाऊबीज सणाचा खरा संदेश असल्याचे त्यांनी सांगितले.
खताळ यांनी शासनाच्या विविध कल्याणकारी योजनांचा उल्लेख केला. महायुती सरकारच्या माध्यमातून उपमुख्यमंत्री तथा शिवसेनेचे मुख्य नेते एकनाथ शिंदे यांनी महिलांच्या सन्मानासाठी आणि त्यांना आर्थिकदृष्ट्या सक्षम करण्यासाठी मुख्यमंत्री माझी लाडकी बहीण योजना, मुलींना मोफत उच्च शिक्षण, तसेच लखपती दीदी योजना आणि महिला बचतगटांच्या माध्यमातून महिलांना आर्थिक स्वावलंबनाच्या संधी उपलब्ध करून दिल्याचे त्यांनी स्पष्ट केले.