महाराष्ट्र संवाद न्यूज ऑनलाईन- नाशिक पदवीधर मतदारसंघात आमदार सत्यजित तांबे यांच्याविरोधात आक्रमक लढा देणाऱ्या शिवसेनेच्या नेत्या शुभांगीताई पाटील यांनी भाऊबीजेच्या निमित्ताने थेट धुळ्याहून संगमनेर गाठत आमदार अमोल खताळ पाटील यांची भेट घेतली. या भेटीदरम्यान शुभांगी ताईंनी आमदार खताळ यांचे औक्षण करत त्यांना भाऊबीजेच्या शुभेच्छा दिल्या आणि राजकीय वातावरणात एक वेगळाच संदेश दिला.
नात्यांमधील जिव्हाळा आणि आपुलकी ही राजकीय मतभेदांपेक्षा कितीतरी मोठी असते, याची प्रचिती भाऊबीजेच्या मुहूर्तावर संगमनेरकरांना आली. निवडणुकीच्या रणधुमाळीत राजकीय नेते परस्परांवर टीकास्त्रांची झोड उठवत असतात. राजकीय विरोध आणि मतभेद उफाळून येत असतानाच, सण-उत्सवांच्या काळात हे वैर बाजूला ठेवून नात्यांचे स्नेहबंध जपणे ही महाराष्ट्राची मोठी राजकीय परंपरा मानली जाते.
याच परंपरेचा प्रत्यय देत शुभांगीताई पाटील यांनी केवळ भाऊबीज साजरी करण्यासाठी धुळ्यापासून संगमनेरपर्यंतचा प्रवास केला. निवडणुकीच्या रिंगणात, राजकारणात तांबेंच्या विरोधक म्हणून पुढे आलेल्या या दोन नेत्यांमधील हा स्नेहाचा बंध सध्या संगमनेरसह संपूर्ण अहमदनगर जिल्ह्याच्या राजकीय वर्तुळात चर्चेचा आणि कौतुकाचा विषय ठरला आहे.
राजकीय समीकरणे, पक्षांतरे आणि आरोप-प्रत्यारोपांच्या पलीकडे जाऊन जपलेली ही माणुसकी आणि आपुलकी अनेकांचे लक्ष वेधून घेत आहे. निवडणुकीचे मैदान वेगळे आणि वैयक्तिक आयुष्यातील स्नेहबंध वेगळे, हेच या औक्षणातून अधोरेखित झाले आहे. भाऊबीजेच्या या खास प्रसंगाने संगमनेरच्या राजकारणात एक वेगळाच अध्याय जोडला आहे.
