दिवाळी खरेदीच्या गर्दीत आमदार अमोल खताळ यांचा ‘सरप्राईज’ जनसंपर्क; व्यापाऱ्यांसह नागरिकांना दिल्या शुभेच्छा!

महाराष्ट्र संवाद न्यूज ऑनलाईन-
दिवाळी सणाच्या पार्श्वभूमीवर संगमनेर शहरातील मुख्य बाजारपेठेत खरेदीसाठी नागरिकांची गर्दी होत असताना आमदार अमोल खताळ पाटील यांनी थेट बाजारपेठेत उतरून जनसंपर्क साधला. कोणताही औपचारिकतेचा बडेजाव न करता त्यांनी पायी फिरून व्यापारी, खरेदीसाठी आलेले नागरिक, महिला आणि लहान मुलांशी अत्यंत आपुलकीने संवाद साधला. प्रत्येकाची भेट घेऊन हस्तांदोलन करत त्यांनी सर्वांना दीपावलीच्या मनःपूर्वक शुभेच्छा दिल्या. आमदार खताळ यांच्या या साध्या आणि आपुलकीच्या वागण्यामुळे संपूर्ण बाजारपेठेत एक वेगळाच उत्साह पाहायला मिळाला.
दिवाळीच्या काळात बाजारपेठेत ग्राहकांची मोठी वर्दळ असते. या पार्श्वभूमीवर आमदार खताळ यांनी लहानांपासून मोठ्यांपर्यंत आणि छोट्या व्यावसायिकांपासून ते मोठ्या व्यापाऱ्यांपर्यंत सर्वांच्या दुकानांमध्ये जाऊन थेट विचारपूस केली. सणासुदीच्या दिवसांत व्यापार कसा चालला आहे, ग्राहकांचा प्रतिसाद कसा आहे आणि सध्याच्या व्यापारात काही अडचणी आहेत का, याची आस्थेवाईक माहिती त्यांनी व्यापाऱ्यांकडून घेतली.
रस्त्याने ये-जा करणाऱ्या नागरिकांशी थांबून संवाद साधत त्यांनी लहान मुलांनाही प्रेमाने दिवाळीच्या शुभेच्छा दिल्या. लोकप्रतिनिधीने अशा प्रकारे सर्वसामान्य जनतेत मिसळून संवाद साधल्याने व्यापारी आणि नागरिकांकडून याचे जोरदार स्वागत करण्यात आले.
या सदिच्छा भेटीची सुरुवात ऐतिहासिक छत्रपती शिवाजी महाराज स्मारकापासून झाली. त्यानंतर त्यांनी अशोक चौक, मेन रोड, कुंभार गल्ली आणि नेहरू चौक या संगमनेर शहरातील प्रमुख आणि मध्यवर्ती बाजारपेठांमधून पायी फिरत प्रत्येकाची भेट घेतली. प्रत्येक दुकानाला भेट देऊन व्यापाऱ्यांशी संवाद साधत त्यांनी स्थानिक प्रश्न आणि अडचणी जाणून घेतल्या.
या संपूर्ण सदिच्छा भेटीचा समारोप स्वातंत्र्यवीर सावरकर चौकात झाला. ऐन दिवाळीच्या धावपळीत आमदारांनी थेट बाजारात येऊन साधलेल्या या थेट संवादामुळे या भेटीला राजकीय आणि सामाजिक वर्तुळात विशेष महत्त्व प्राप्त झाले आहे.