संगमनेर तालुक्यात दुष्काळाची छाया: आमदार अमोल खताळ यांच्याकडून आदिवासी पाड्यांवर दिवाळी शिधा, साड्या आणि मिठाईचे वाटप

महाराष्ट्र संवाद न्यूज ऑनलाईन-
संगमनेर तालुक्यात यंदा दुष्काळाचे भीषण संकट ओढवले असून शेतकरी, शेतमजूर आणि आदिवासी पाड्यांवरील गोरगरीब कुटुंबांसमोर उदरनिर्वाहाचा बिकट प्रश्न निर्माण झाला आहे. अशा कठीण परिस्थितीतही वंचित घटकांच्या चेहऱ्यावर आनंदाचे हसू फुलावे या सामाजिक बांधिलकीतून महायुतीचे आमदार अमोल खताळ यांनी मदतीचा हात पुढे केला आहे.
शिवसेनेचे मुख्य नेते तथा उपमुख्यमंत्री एकनाथ शिंदे यांच्या मार्गदर्शनाखाली आमदार खताळ यांनी कर्जुले पठार येथील येठेवाडी, गुंजाळवाडी पठार येथील काटवणवाडी आणि डोळासणे येथील दुबेवाडी परिसरातील आदिवासी व गरजू कुटुंबांना दिवाळी शिधा, साड्या, मिठाई आणि फटाक्यांचे वाटप करून त्यांची दिवाळी खऱ्या अर्थाने गोड केली.
यावेळी बोलताना आमदार अमोल खताळ म्हणाले की, राज्यात सध्या दुष्काळी परिस्थिती निर्माण झाली असली तरी महायुती सरकार सर्वसामान्य नागरिकांच्या पाठीशी भक्कमपणे उभे आहे. दुष्काळाची खरी तीव्रता डिसेंबर आणि जानेवारीनंतर जाणवणार असल्याने संभाव्य पाणीटंचाईचा सामना करण्यासाठी आतापासूनच नियोजन सुरू करण्यात आले आहे.
ज्या गावांमध्ये पिण्याच्या पाण्याची टंचाई भासेल, तिथे शासकीय टँकर सुरू केले जातीलच, शिवाय गरजेनुसार शिवसेनेच्या वतीने खासगी टँकरद्वारेही दुष्काळग्रस्त गावांना पाणीपुरवठा केला जाईल अशी ग्वाही त्यांनी दिली.
स्वातंत्र्यानंतरही वीजपुरवठ्यापासून वंचित राहिलेल्या येठेवाडी, काटवणवाडी व दुबेवाडी या वाड्या-वस्त्यांवर तालुक्यात परिवर्तन झाल्यानंतर विद्युत रोहित्रे उपलब्ध करून देण्यात आली आहेत. ही रोहित्रे तातडीने कार्यान्वित करून वीजपुरवठा सुरू करण्याचे निर्देश महावितरणच्या अधिकाऱ्यांना देण्यात आले असून लवकरच या भागातील अंधार दूर होईल असा विश्वास आमदार खताळ यांनी व्यक्त केला.
या मदत वाटप उपक्रमादरम्यान शिवसेनेचे उपजिल्हाप्रमुख रणजित ढेरंगे, भाजपचे तालुकाध्यक्ष गुलाब भोसले, कर्जुले पठारचे माजी सरपंच रवींद्र भोर यांच्यासह स्थानिक पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.