महाराष्ट्र संवाद न्यूज ऑनलाईन- संगमनेर नगरपालिका निवडणुकीत यश मिळाले म्हणून विरोधकांनी हुरळून जाऊ नये. तुमचे नगरसेवक टक्केवारी वसूल करण्याचे काम करतात; मात्र आमचे कार्यकर्ते नगरसेवक नसले तरी जनतेचे प्रश्न सोडविण्यासाठी रस्त्यावर उतरून जनसेवक म्हणून काम करत आहे शहरातील सर्वसामान्य नागरिक, व्यापारी आणि व्यावसायिकांना कोणी धमकावण्याचा प्रयत्न करत असेल, तर ते अजिबात खपवून घेतले जाणार नसल्याचा इशारा आमदार अमोल खताळ यांनी आपल्या विरोधकांना दिला आहे.
संगमनेर शहरातील अकोले नाका परिसरात शिवसेनेच्या शिव वाहतूक सेनेचे उद्घाटन आमदार खताळ यांच्या हस्ते करण्यात आले. यावेळी आयोजित कार्यक्रमात ते बोलत होते. व्यासपीठावर शिवसेनेचे शहरप्रमुख विनोद सूर्यवंशी, नगरसेविका साक्षी सूर्यवंशी यांच्यासह महायुतीचे पदाधिकारी, कार्यकर्ते उपस्थित होते.
खताळ म्हणाले, मला राजकारण कळत नाही, असा काहींचा समज असेल तर त्यांनी तो मनातून काढून टाकावा. दिवाळीनंतर राजकारणाचे डावपेच कसे खेळायचे असतात, हे दाखवून देऊ. राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे व माजी उपमुख्यमंत्री स्व. अजित पवार, पालकमंत्री राधाकृष्ण विखे पाटील यांच्यासोबत काम करण्याची संधी मला मिळाली आहे. त्यामुळे मला राजकारण शिकवण्याच्या फंदात कोणी पडू नका. दिवाळीनंतर डावपेच काय आहे हे मी तुम्हाला दाखवून देईल.
नातेवाईकांचे दवाखाने सुरू राहावे, म्हणून तुम्ही नगरपालिकेचे कॉटेज रुग्णालय बंद पाडले असून आता घुलेवाडी ग्रामीण रुग्णालयामध्ये १०० खाटांचे केवळ महिला व लहान मुलांसाठी स्वतंत्र रुग्णालय सुरू करण्यात येणार आहे. लवकरच आरोग्यमंत्री संगमनेरमध्ये येऊन येथील आरोग्य व्यवस्था सक्षम करण्याच्या दृष्टीने पावले उचलतील.
उपमुख्यमंत्री एकनाथ शिंदे यांच्या नेतृत्वाखाली महायुती सरकारने विकासकामांना गती दिली. शेतकरी, कामगार, महिला, युवक आणि सर्वसामान्य नागरिकांच्या प्रश्नांना प्राधान्य देणे, हे शिवसेनेचे धोरण आहे. दुष्काळी परिस्थितीत शेतकऱ्यांच्या बांधावर जाऊन त्यांच्या समस्या समजून घेण्याचा प्रयत्न करण्यात आला. आगामी काळात महिलांना आर्थिकदृष्ट्या सक्षम करण्यासाठी बचतगटांच्या माध्यमातून विविध उपक्रम राबविण्यात येतील. तसेच गरजू महिलांना शिलाई यंत्रे उपलब्ध करून देण्याचाही प्रयत्न केला जाईल.
निवडणुका डोळ्यांसमोर ठेवून काम करणारा आमचा पक्ष नाही. जनतेच्या प्रश्नांसाठी चोवीस तास कार्यरत राहणे, हेच आमचे ध्येय आहे. सामान्य कार्यकर्त्याला जनतेने संधी दिल्यामुळेच आज मी आमदार झालो आहे. शिव वाहतूक सेनेच्या स्थापनेच्या निमित्ताने रिक्षाचालकांना संघटित करून त्यांच्या अडचणी सोडविण्यासाठी प्रयत्न केले जाणार असल्याचेही त्यांनी सांगितले.
संगमनेर शहरासह तालुक्यातील प्रत्येक गावात आणि शहरातील प्रत्येक उपनगरात ‘गाव तेथे शाखा आणि घर तेथे शिवसैनिक’ हा उपक्रम राबवून शिवसेनेच्या शाखा सुरू करण्याचा निर्धार खताळ यांनी व्यक्त केला. आगामी काळात होणाऱ्या निवडणुका लोकशाही मार्गाने लढविल्या जातील. शिवसेनेचा सामान्य कार्यकर्तादेखील निवडणुकीच्या मैदानात उतरेल, असे त्यांनी स्पष्ट केले.
