अभिवादन आणि भंडारदरा धरणाच्या शताब्दीनिमित्त सांगितिक मेजवानीने संगमनेरकर मंत्रमुग्ध; संगमनेरचा ‘दिवाळी पहाट गाणी’ कार्यक्रम राज्यात सर्वोत्तम: बाळासाहेब थोरात

महाराष्ट्र संवाद न्यूज ऑनलाईन-
राज्यात अनेक ठिकाणी दिवाळी पहाट गाण्याचे कार्यक्रम आयोजित केले जातात, मात्र संगमनेरमधील स्थानिक कलाकार अतिशय दर्जेदार सादरीकरण करत असल्याने येथील ‘दिवाळी पहाट गाणी’ हा कार्यक्रम राज्यात सर्वोत्तम ठरतो, असे गौरवोद्गार राज्याचे माजी महसूलमंत्री बाळासाहेब थोरात यांनी काढले.
भंडारी मंगल कार्यालय येथे संगमनेर इतिहास संशोधन मंडळ आणि वाचन कट्टा समूहाच्या वतीने आयोजित दिवाळी पहाट कार्यक्रमात ते बोलत होते. या विशेष मैफलीतून दिग्गज कलावंत आशा भोसले, सुमन कल्याणपूर, अभिनेते नाना पाटेकर आणि अभिनेत्री मधू कांबीकर यांना सांगितिक अभिवादन करण्यात आले, तसेच भंडारदरा धरणाच्या शताब्दी वर्षानिमित्त धरणाबद्दल कृतज्ञताही व्यक्त करण्यात आली.
या सोहळ्यास माजी आमदार डॉ. सुधीर तांबे, कांचनताई थोरात, माजी नगराध्यक्ष दुर्गाताई तांबे, एकविरा फाउंडेशनच्या अध्यक्ष डॉ. जयश्रीताई थोरात, अमृतवाहिनी बँकेचे चेअरमन सुधाकर जोशी, व्हाईस चेअरमन नानासाहेब शिंदे आणि उत्कर्षा रुपवते आदी मान्यवर उपस्थित होते.
लोककला अभ्यासक डॉ. संतोष खेडलेकर यांची संकल्पना आणि निवेदन असलेल्या या कार्यक्रमात यावर्षीच्या दिवाळी पहाटेला एक वेगळीच उंची लाभली. यंदा भंडारदरा धरणाला शंभर वर्षे पूर्ण झाल्याचे औचित्य साधून धरण आणि परिसरात चित्रित झालेली विविध चित्रपटांतील गाणी सादर करून धरणाप्रति सांगितिक कृतज्ञता व्यक्त करण्यात आली.
याप्रसंगी मार्गदर्शन करताना माजी मंत्री बाळासाहेब थोरात म्हणाले की, प्रत्येक जण वर्षभर धावपळ करत असतो, अशात दीपावली हा चार दिवसांचा आनंदाचा कालखंड प्रत्येकाने उत्साहाने साजरा केला पाहिजे. संगमनेरमधील पहाट गाण्यांच्या कार्यक्रमाची रसिकांना नेहमीच ओढ असते. यंदा आशा भोसले, सुमन कल्याणपूर, नाना पाटेकर आणि मधू कांबीकर यांच्या आठवणी जागवल्या गेल्याने हा सोहळा अविस्मरणीय ठरला आहे. संगमनेरला साहित्यिक, कलावंत आणि विचारवंतांची मोठी परंपरा असून ही समृद्ध परंपरा आपल्या सर्वांना जोपासायची असल्याचे आवाहन त्यांनी केले.
माजी आमदार डॉ. सुधीर तांबे यांनी खेडलेकर यांच्या माध्यमातून दरवर्षी हा सुंदर कार्यक्रम होत असल्याचे सांगत पहाट गाणी कार्यक्रम हे संगमनेरचे सांस्कृतिक वैशिष्ट्य ठरत असल्याचे नमूद केले. तर डॉ. जयश्रीताई थोरात यांनी संगीतामुळे सणाचा आनंद द्विगुणीत होतो असे सांगत या कार्यक्रमाच्या मोठ्या परंपरेचे कौतुक केले.
या मैफलीत ‘मराठी इंडियन आयडॉल’ फेम गायिका सुरभी कुलकर्णी आणि गायक विकास भालेराव यांनी एकापेक्षा एक सरस गीते सादर करून रसिकांची मने जिंकली. त्यांना सत्यजित सराफ, अजित गुंदेचा, श्रीकांत गडकरी, दिलावर शेख आणि वैभव पवार यांनी उत्तम संगीत साथ दिली.
कार्यक्रमाची तांत्रिक बाजू आर्किटेक्ट अभिजित खेडलेकर यांनी सांभाळली, तर समन्वयक म्हणून देवीदास गोरे यांनी महत्त्वाची भूमिका बजावली. या कार्यक्रमास इतिहास संशोधन मंडळाचे अध्यक्ष द्वारकानाथ राठी, डॉ. अरविंद रसाळ यांच्यासह संगीत रसिक उपस्थित होते.