आदर्श स्वच्छ व सुंदर संगमनेरची संकल्पना पूर्णत्वाकडे: माजी मंत्री बाळासाहेब थोरात; विरोधकांवरही जोरदार निशाणा!, ५ कोटींच्या नवीन स्वच्छता वाहनांचे दिमाखात लोकार्पण

महाराष्ट्र संवाद न्यूज ऑनलाईन-
संगमनेर हे अत्यंत विकसित आणि वैभवशाली शहर म्हणून ओळखले जाते. नागरिकांना अत्याधुनिक नागरी सुविधा पुरवण्यासोबतच शहरात स्वच्छतेची एक नवी संस्कृती रुजली आहे. सार्वजनिक स्वच्छतेच्या या चळवळीत स्थानिक नागरिकांचा सहभाग अत्यंत मोलाचा असून नगरपरिषदेने सेवेत दाखल केलेल्या नवीन अत्याधुनिक वाहनांमुळे ‘आदर्श स्वच्छ व सुंदर संगमनेर’ ही संकल्पना आता पूर्णत्वाकडे जात आहे, असे गौरवोद्गार राज्याचे माजी मंत्री बाळासाहेब थोरात यांनी काढले.
दिवाळीच्या शुभमुहूर्तावर यशोधन कार्यालय येथे संगमनेर नगरपालिकेच्या वतीने ‘एक पणती स्वच्छतेची’ या विशेष उपक्रमांतर्गत सुमारे ५ कोटी रुपये खर्चाच्या विविध स्वच्छता वाहनांचे लोकार्पण करण्यात आले. यामध्ये २ अत्याधुनिक स्वीपिंग मशीन, १० नवीन घंटागाड्या, ५ जुन्या घंटागाड्यांचे नूतनीकरण (रिनोव्हेशन), ४ ट्रॅक्टर आणि इतर २ वाहनांचा समावेश आहे. या सोहळ्याप्रसंगी बाळासाहेब थोरात बोलत होते.
व्यासपीठावर आमदार सत्यजित तांबे, माजी आमदार डॉ. सुधीर तांबे, नगराध्यक्ष डॉ. मैथिलीताई तांबे, डॉ. जयश्रीताई थोरात, उपनगराध्यक्ष नूरमोहम्मद शेख, डॉ. संजय मालपाणी, माजी नगराध्यक्ष दिलीपराव पुंड, विश्वासराव मुर्तडक, कैलास लोणारी, अरुण वाकचौरे, सभापती किशोर टोकसे, मुख्याधिकारी डॉ. दयानंद गोरे यांच्यासह नगरपरिषद पदाधिकारी, सर्व नगरसेवक आणि नागरिक मोठ्या संख्येने उपस्थित होते.
बाळासाहेब थोरात म्हणाले की, माजी आमदार डॉ. सुधीर तांबे यांच्या नगराध्यक्ष पदाच्या काळापासून संगमनेरमध्ये आदर्श कामांची भक्कम परंपरा सुरू झाली. त्यानंतर दुर्गाताई तांबे यांच्या कार्यकाळात स्वच्छतेवर ऐतिहासिक काम झाल्याने संगमनेर नगरपालिकेला राज्य व राष्ट्रीय पातळीवरील सर्वोच्च पुरस्कार मिळाले आहेत. नव्या वाहनांमुळे आता संगमनेर शहर पूर्णपणे धूळमुक्त आणि स्वच्छ होण्यास मोठी मदत होणार आहे. शहरात सध्या मुबलक पाणी असले तरी दुष्काळी परिस्थिती लक्षात घेता नागरिकांनी पाण्याचा वापर जपून करावा आणि सार्वजनिक स्वच्छतेत सक्रीय सहभाग नोंदवावा, असे आवाहनही त्यांनी केले.
कार्यक्रमात बोलताना आमदार सत्यजित तांबे यांनी नगरपरिषदेच्या भावी योजनांचा पट मांडला. मागील ९ महिन्यांत संगमनेर २.० उपक्रमांतर्गत सातत्याने नाविन्यपूर्ण प्रयोग केले जात आहेत. मुख्यमंत्री आणि महाराष्ट्र प्रदूषण नियंत्रण मंडळाच्या विशेष सहकार्यातून संपूर्ण राज्यातून केवळ संगमनेर नगरपालिकेला अडीच कोटींचे पहिले अत्याधुनिक स्वीपिंग मशीन मिळाले आहे. या मशीनच्या पुढील ५ वर्षांच्या देखभाल-दुरुस्तीची जबाबदारी राज्य सरकारची असणार आहे. शहराला शून्य टक्के कचरामुक्त करणे, भाजी मार्केट आणि ९ ठिकाणी फूड कोर्ट उभारणे, तसेच सौर ऊर्जा प्रकल्पाच्या माध्यमातून नगरपालिकेचे विजेचे बिल शून्य टक्क्यांवर आणण्याचा निर्धार त्यांनी व्यक्त केला.
यावेळी विरोधकांच्या टीकेचा खरपूस समाचार घेताना आमदार तांबे यांनी स्पष्ट बजावले की, धूळमुक्तीसाठी निधी कसा आणायचा आणि विकासकामे कशी करायची हे आम्हाला चांगले ठाऊक आहे. विरोधकांना या मशीन आणि निधीबाबत साधी माहितीही नव्हती, पण काम पूर्ण झाल्यावर ते श्रेय घेण्यासाठी जागे झाले आहेत. आम्ही जनतेच्या पैशांची बचत करून अहोरात्र काम करतो, त्यामुळे सोशल मीडियावरून चुकीच्या गोष्टी पसरवणाऱ्या विरोधकांच्या बुद्धीची कीव येते, असा टोला त्यांनी लगावला.
माजी आमदार डॉ. सुधीर तांबे यांनी सांगितले की, नवीन स्वीपिंग मशीनच्या साहाय्याने शहरात एका दिवसात तब्बल ४० किलोमीटर लांबीच्या रस्त्यांची स्वच्छता होणार आहे, यामुळे शहराची ओळख अधिक उजळेल. या मोहिमेत विद्यार्थ्यांनी ‘स्वच्छता दूत’ म्हणून सहभाग घ्यावा, असे त्यांनी सुचवले.
दुर्गाताई तांबे यांनी नगरपालिकेच्या गौरवशाली प्रवासाचा उल्लेख करत शहरात उभारण्यात आलेल्या ३७ उद्यानांची आणि ओला-सुका कचरा वर्गीकरणाच्या यशस्वी संस्कृतीची माहिती दिली.
कार्यक्रमाचे प्रास्ताविक नगराध्यक्ष डॉ. मैथिलीताई तांबे यांनी केले. त्यांनी पहाटेपासून राबणाऱ्या सर्व स्वच्छता कर्मचाऱ्यांच्या कष्टाचा गौरव करत नागरिकांना सहकार्याचे आवाहन केले. उपनगराध्यक्ष नूर मोहम्मद शेख यांनी उपस्थितांचे आभार मानले. यावेळी सौरभ कासार, नगरसेवक शैलेश कलंत्री, गजेंद्र अभंग, नितीन अभंग, किशोर पवार, डॉ दानिश पठाण, गणेश गुंजाळ, मुजीब खान पठाण, अमजदखान पठाण, भारत बोऱ्हाडे, मालती डाके, शोभा पवार, सीमा खटाटे, अर्चना दिघे, विजया गुंजाळ, डॉ. अनुराधा सातपुते, प्राची काशीद, दिपाली पंचारिया, सरोजना पगडाल, प्रियंका शहा, नंदा गरुडकर, शकीला बेग, जावेद पठाण, उप मुख्याधिकारी संजय पेकळे, सोमेश्वर दिवटे, अजय फटांगरे, निखिल पापडेजा,ॲड संग्राम जोंधळे, यांच्यासह विविध पदाधिकारी उपस्थित होते.