राजहंस दूध संघाकडून दिवाळीनिमित्त ५० कोटी रुपये वर्ग; दोन संस्थांच्या माध्यमातूनच ७२ कोटी कोटी रुपये बाजारात, संगमनेर तालुक्यात आनंदाचे वातावरण

महाराष्ट्र संवाद न्यूज ऑनलाईन-
राजहंस दूध संघाने दिवाळीच्या पार्श्वभूमीवर दूध उत्पादक, शेतकरी व कामगारांचे दूध दर फरक, बोनस व अनामत रकमेपोटी सुमारे ५० कोटी रुपये बँक खात्यात वर्ग केले आहेत. माजी मंत्री बाळासाहेब थोरात यांच्या मार्गदर्शनाखाली आणि दूध संघाचे माजी चेअरमन तथा अहिल्यानगर जिल्हा बँकेचे नवनिर्वाचित संचालक रणजितसिंह देशमुख यांच्या प्रमुख उपस्थितीत ही घोषणा करण्यात आली. या निर्णयामुळे तालुक्यातील हजारो दूध उत्पादकांची दिवाळी गोड होणार असून ग्रामीण अर्थव्यवस्थेला मोठी चालना मिळणार आहे.
संगमनेर तालुका सहकारी दूध उत्पादक संघाने यंदाही आपली परंपरा कायम राखत दीपावलीपूर्वीच ही मोठी आर्थिक मदत जमा केली आहे. संघाची वार्षिक उलाढाल ६०९ कोटी रुपयांच्या घरात असून, दूध खरेदीपोटी उत्पादकांना दरवर्षी सुमारे ५०० कोटी रुपये दिले जातात. नियमितपणे दर पंधरा दिवसांनी मिळणाऱ्या या पेमेंटमुळे ग्रामीण भागातील अर्थकारण सुरळीत चालण्यास मदत होते.
सध्या दुष्काळी परिस्थितीमुळे चाऱ्याची व पाण्याची समस्या निर्माण झाली असली, तरी अडचणीच्या काळात संघ नेहमीच दूध उत्पादकांच्या पाठीशी उभा राहिला आहे. मिशन ५० एलच्या माध्यमातून ५० लिटर दुधाच्या गाई निर्माण करण्याचे महत्त्वाकांक्षी उद्दिष्ट ठेवण्यात आले असून, यामुळे दुग्धव्यवसायात नवी क्रांती होईल असा विश्वास व्यक्त करण्यात येत आहे.
या निधीमुळे संगमनेरच्या बाजारपेठेत मोठ्या प्रमाणावर उलाढाल होणार असून व्यापारीवर्गातही उत्साहाचे वातावरण आहे. दोन दिवसांपूर्वीच सहकार महर्षी भाऊसाहेब थोरात सहकारी साखर कारखान्याच्या माध्यमातून सुमारे २२ कोटी रुपये वर्ग करण्यात आले होते आता त्या पाठोपाठ राजहंस दूध संघाने देखील ५० कोटी रुपये बँक खात्यात वर्ग गेल्यानंतर बाजारामध्ये या दोन संस्थांच्या माध्यमातून तब्बल ७२ कोटी रुपयांची उलाढाल होईल. संगमनेरातील अन्य काही संस्थांच्या माध्यमातून देखील मोठ्या प्रमाणात बाजारात पैसे येणार असल्याने हा आकडा सुमारे दीडशे ते दोनशे कोटीच्या घरात पोहोचतो.