संगमनेरच्या बाजारपेठेला मोठा दिलासा, दुष्काळाच्या संकटातही थोरात कारखान्याचा मोठा निर्णय; कामगारांना मिळणार इतका बोनस अन् सानुग्रह अनुदान; ऊस उत्पादकांना प्रतिटन एवढी मदत! लोकनेते बाळासाहेब थोरात यांची घोषणा

महाराष्ट्र संवाद न्यूज ऑनलाईन-
यावर्षीचा दुष्काळ हा कोरोना संकटाप्रमाणे असून कठीण दुष्काळी संकटातून मार्ग काढत सर्वांची दिवाळी आनंदात साजरी करण्यासाठी सहकारमहर्षी भाऊसाहेब थोरात सहकारी साखर कारखान्याने कामगार आणि शेतकरी यांच्यासाठी मोठा निर्णय घेतला आहे. यावर्षी दिवाळीनिमित्त कारखान्यातील कामगारांना २० टक्के बोनस आणि ३० दिवसांचे सानुग्रह अनुदान दिले जाणार असल्याची घोषणा राज्याचे वरिष्ठ नेते व माजी मंत्री बाळासाहेब थोरात यांनी केली.
बुधवारी थोरात कारखान्याच्या गळीत हंगाम शुभारंभावेळी माजी मंत्री बाळासाहेब थोरात यांनी ही घोषणा केली. थोरात कारखाने कायमच सभासद, ऊस उत्पादक शेतकरी आणि कामगारांचे हित जपले असून, यंदाच्या दुष्काळी परिस्थितीमध्येही कारखान्याकडून ऊस उत्पादकांना चांगला भाव मिळणार आहे. याशिवाय कार्यक्षेत्रातील ऊस उत्पादकांना प्रोत्साहन म्हणून प्रतिटन २०० रुपयांचे अनुदान दिले जाणार आहे. कार्यक्षेत्रात हक्काचा ऊस वाढवणे अत्यंत गरजेचे असून काटकसर आणि मेहनतीच्या जोरावर कारखाना या संकटावर मात करेल, असा विश्वास यावेळी व्यक्त करण्यात आला.
तसेच या भीषण दुष्काळाच्या काळात केवळ कारखानदारीवरच नव्हे, तर शेतकरी, शेतमजूर आणि सर्वसामान्य नागरिकांवरही मोठे संकट आले आहे. त्यामुळे राज्य सरकारने या सर्वांना तातडीने आर्थिक मदत देऊन दिलासा द्यावा, अशी आग्रही अपेक्षा बाळासाहेब थोरात यांनी या निमित्ताने व्यक्त केली. थोरात यांनी केलेल्या घोषणेमुळे बाजारपेठेत ऐन दीपावली सणासाठी मोठ्या प्रमाणात उलाढाल होण्याची चिन्हे निर्माण झाली आहे.