संगमनेरमध्ये उद्या ‘एक पणती स्वच्छतेची’ जनजागृती रॅली; नगराध्यक्ष डॉ. मैथिली तांबे यांचे नागरिकांना उपस्थित राहण्याचे आवाहन

महाराष्ट्र संवाद न्यूज ऑनलाईन-
संगमनेर नगरपरिषदेच्या वतीने शहराच्या स्वच्छतेचा संदेश देण्यासाठी आणि सुंदर भविष्याचा संकल्प दृढ करण्यासाठी ‘एक पणती स्वच्छतेची, संगमनेरच्या सुंदर भविष्याची’ या संकल्पनेअंतर्गत एका विशेष जनजागृती रॅलीचे आयोजन करण्यात आले आहे.ही भव्य रॅली उद्या, बुधवारी (दिनांक ४ नोव्हेंबर) सायंकाळी ठीक ४:०० वाजता आयोजित करण्यात आली असल्याची माहिती संगमनेरच्या लोकनियुक्त नगराध्यक्ष डॉ. मैथिली तांबे यांनी दिली आहे.
लोकनेते व राज्याचे माजी मंत्री बाळासाहेब थोरात, विद्यमान आमदार सत्यजित तांबे तसेच माजी आमदार डॉ. सुधीर तांबे यांच्या मार्गदर्शनाखाली संगमनेर नगरपरिषद सातत्याने लौकिकास्पद कामगिरी करत आहे. याच उपक्रमाचा एक भाग म्हणून आयोजित करण्यात आलेल्या या स्वच्छतेच्या रॅलीचा औपचारिक शुभारंभ संगमनेरच्या माजी प्रथम महिला नगराध्यक्ष दुर्गाताई तांबे यांच्या हस्ते व इतर विविध मान्यवरांच्या प्रमुख उपस्थितीत पार पडणार आहे.
ही जनजागृती रॅली शहरातील ‘यशोधन’ कार्यालयापासून सुरू होईल. त्यानंतर शहराच्या प्रमुख मार्गांवरून फिरत, स्वच्छतेचा संदेश देत या रॅलीचा समारोप मालपाणी विद्यालय येथे होणार आहे. स्वच्छतेचा विचार प्रत्यक्ष कृतीत आणण्यासाठी आणि संगमनेरच्या उज्वल व सुंदर भविष्यासाठी शहरातील नागरिकांनी, महिलांनी व तरुणांनी या रॅलीमध्ये मोठ्या संख्येने सहभागी व्हावे, असे आग्रही आवाहन मुख्याधिकारी दयानंद गोरे यांच्यासह संगमनेर नगरपरिषदेच्या वतीने करण्यात आले आहे.