संगमनेर शहरावरही दुष्काळाची छाया! शिवसेनेच्या नगरसेविका साक्षी सूर्यवंशी यांनी नगराध्यक्षांकडे केली घरपट्टी आणि पाणीपट्टीमध्ये ५० टक्के सवलतीची मागणी

महाराष्ट्र संवाद न्यूज ऑनलाईन-
संगमनेर तालुक्यासह संपूर्ण अहिल्यानगर जिल्हा शासनाने दुष्काळग्रस्त घोषित केल्याच्या पार्श्वभूमीवर, ग्रामीण भागाप्रमाणेच आता संगमनेर शहरातील सर्वसामान्य नागरिक, व्यापारी आणि व्यावसायिक यांनाही आर्थिक फटका बसत असल्याचा मुद्दा ऐरणीवर आला आहे. या गंभीर परिस्थितीची दखल घेत शिवसेनेच्या नगरसेविका साक्षी सूर्यवंशी यांनी थेट नगराध्यक्ष डॉ. मैथिली तांबे यांच्याकडे निवेदन देत शहरातील निवासी मालमत्ताधारकांना घरपट्टी आणि पाणीपट्टीमध्ये चालू आर्थिक वर्षासाठी ५० टक्क्यांपर्यंत सवलत देण्याची मागणी केली आहे.
दुष्काळाच्या झळा केवळ ग्रामीण भागापुरत्या मर्यादित नसून त्याचा प्रत्यक्ष-अप्रत्यक्ष परिणाम शहरी कुटुंबांच्या अर्थकारणावरही होत असल्याने नगरपरिषदेने या संकटकाळात नागरिकांच्या पाठीशी उभे राहावे, अशी आग्रही भूमिका त्यांनी घेतली आहे.
या निवेदनामध्ये केवळ सवलतीची मागणी करून न थांबता, त्यासाठी नगरपरिषदेच्या विशेष सर्वसाधारण सभेत तातडीने प्रस्ताव मांडून ठराव मंजूर करण्याची कायदेशीर प्रक्रिया पार पाडण्याची सूचनाही करण्यात आली आहे. तसेच, नगरपरिषदेच्या अधिकारक्षेत्राबाहेरील बाबींसाठी जिल्हाधिकारी, नगर प्रशासन संचालनालय आणि नगरविकास विभागाकडे तातडीने प्रस्ताव पाठवून मंजुरी घ्यावी, अशी ठोस मागणी करण्यात आली आहे.
शासनाच्या दुष्काळी निर्णयाच्या अनुषंगाने शहरातील नागरिकांना कोणत्या अन्य शासकीय सवलती लागू होऊ शकतात, याबाबत पालिका प्रशासनाने अधिकृत माहिती व कायदेशीर अभिप्राय सादर करावा, असेही त्यांनी नगराध्यक्षांकडे केलेल्या मागणीत म्हटले आहे. दुष्काळी स्थितीमध्ये संगमनेर नगर परिषदेने संगमनेरकर नागरिकांच्या पाठीशी उभे राहण्याची आवश्यकता आहे. आपण केलेली मागणी ही संगमनेर करांच्या आर्थिक हिताची असल्याने प्रशासनाने यात लक्ष घालावे असे देखील त्यांनी म्हटले आहे.
आता या ज्वलंत मागणीवर पालिका प्रशासन नेमकी काय भूमिका घेते आणि येत्या काही दिवसांत शहरात कोणता राजकीय व प्रशासकीय निर्णय होतो, याकडे संपूर्ण संगमनेरकरांचे लक्ष लागले आहे.