आमदार अमोल खताळ यांच्या अधिवेशनातील पाठपुराव्याला यश; राज्यातील १४ हजार ७८७ कंत्राटी आरोग्य कर्मचाऱ्यांना मोठा दिलासा!

महाराष्ट्र संवाद न्यूज ऑनलाईन-

राष्ट्रीय आरोग्य अभियानांतर्गत गेल्या दहा वर्षांहून अधिक काळ आरोग्यसेवा देणाऱ्या राज्यातील १४ हजार ७८७ पात्र कंत्राटी आरोग्य कर्मचाऱ्यांच्या प्रलंबित मागण्यांना अखेर सकारात्मक दिशा मिळाली आहे. या कर्मचाऱ्यांसाठी समकक्ष वेतनश्रेणीतील अधिसंख्य पदे निर्माण करण्यास राज्य शासनाने मान्यता दिली असून, त्यांच्या वेतनासाठी वार्षिक ९८३.८० कोटी रुपयांच्या खर्चालाही मंजुरी दिली आहे. 

या निर्णयामुळे दीर्घकाळापासून सेवेत असूनही नोकरीची अनिश्चितता आणि वेतनाच्या प्रश्नांना सामोरे जाणाऱ्या हजारो आरोग्य कर्मचाऱ्यांना मोठा आर्थिक दिलासा मिळणार आहे. या मागणीसाठी आमदार अमोल खताळ यांनी २०२६ च्या पावसाळी अधिवेशनात उपस्थित केलेल्या प्रश्नांचा आणि केलेल्या पाठपुराव्याचा या निर्णयाच्या पार्श्वभूमीवर उल्लेख होत आहे.

राष्ट्रीय आरोग्य अभियानांतर्गत ग्रामीण तसेच शहरी भागातील नागरिकांना आरोग्यसेवा पुरविण्यात कंत्राटी आरोग्य कर्मचाऱ्यांची भूमिका अत्यंत महत्त्वाची आहे. माता-बाल आरोग्य, लसीकरण, रुग्णसेवा, विविध शासकीय आरोग्य योजनांची अंमलबजावणी, आरोग्यविषयक जनजागृती आणि विविध आरोग्य मोहिमांमध्ये हे कर्मचारी सातत्याने योगदान देत आहेत. अनेक कर्मचाऱ्यांनी प्रतिकूल परिस्थितीत दहा वर्षांहून अधिक काळ सेवा बजावली आहे. मात्र, दीर्घकाळ सेवा करूनही नोकरीतील अनिश्चितता आणि वेतनासंबंधीच्या प्रश्नांमुळे त्यांना अनेक अडचणींचा सामना करावा लागत होता.

या कर्मचाऱ्यांच्या प्रश्नांना न्याय मिळावा, त्यांना त्यांच्या कामाचा योग्य मोबदला मिळावा आणि आर्थिक सुरक्षितता निर्माण व्हावी, यासाठी आमदार अमोल खताळ यांनी विधिमंडळाच्या २०२६ च्या पावसाळी अधिवेशनात शासनाचे लक्ष वेधले होते. राष्ट्रीय आरोग्य अभियानातील कर्मचाऱ्यांना कायमस्वरूपी सेवेत सामावून घेण्याबरोबरच त्यांच्या वेतनात भरीव वाढ करून त्यांना आर्थिक न्याय देण्याची आग्रही मागणी त्यांनी मांडली होती. आरोग्य व्यवस्थेचा महत्त्वाचा आधार असलेल्या या कर्मचाऱ्यांच्या प्रदीर्घ सेवेची दखल घेऊन शासनाने सकारात्मक निर्णय घ्यावा, अशी भूमिका त्यांनी अधिवेशनात मांडली होती.

आमदार खताळ यांनी उपस्थित केलेल्या या प्रश्नाची दखल घेत राज्य शासनाने आता १४ हजार ७८७ पात्र कंत्राटी कर्मचाऱ्यांसाठी समकक्ष वेतनश्रेणीतील अधिसंख्य पदे निर्माण करण्यास मान्यता दिली आहे. त्याचबरोबर या कर्मचाऱ्यांच्या वेतनासाठी ९८३.८० कोटी रुपयांच्या वार्षिक खर्चास मंजुरी देण्यात आली आहे. त्यामुळे अनेक वर्षांपासून प्रलंबित असलेल्या वेतन आणि सेवाविषयक प्रश्नांवर महत्त्वपूर्ण निर्णय झाला आहे.

या निर्णयाबद्दल आमदार अमोल खताळ यांनी सार्वजनिक आरोग्यमंत्री प्रकाश आबिटकर यांचे विशेष आभार मानले आहेत. आरोग्य कर्मचाऱ्यांनी अनेक वर्षांपासून दिलेल्या सेवेचा सन्मान होण्याच्या दृष्टीने हा निर्णय महत्त्वाचा असल्याचे त्यांनी नमूद केले. शासनाच्या या निर्णयामुळे राज्यातील हजारो आरोग्य कर्मचाऱ्यांना आर्थिक स्थैर्य मिळण्यास मदत होणार असून, त्यांच्या कामाला अधिक सुरक्षितता आणि प्रोत्साहन मिळेल, अशी अपेक्षा व्यक्त केली जात आहे.