महाराष्ट्र संवाद न्यूज ऑनलाईन- देशात ‘गरीबी हटाव’चा नारा देत पाकिस्तानचे दोन तुकडे करून जगाचा नकाशा बदलणाऱ्या स्व. इंदिरा गांधी यांचे कणखर आणि खंबीर नेतृत्व भारताला लाभले. बांगलादेशची निर्मिती आणि बँकांचे राष्ट्रीयीकरण यांसारखे ऐतिहासिक व धाडसी निर्णय घेणाऱ्या इंदिराजींनी देशाची अखंडता आणि एकात्मता टिकवण्यासाठी आपल्या प्राणांचे बलिदान दिले, असे प्रतिपादन काँग्रेसच्या राष्ट्रीय कार्यकारिणीचे सदस्य, माजी मंत्री बाळासाहेब थोरात यांनी केले.
सहकारमहर्षी भाऊसाहेब थोरात सहकारी साखर कारखाना कार्यस्थळावरील ‘शक्तीस्थळ’ येथे अमृत उद्योग समूहाच्या वतीने स्व. इंदिरा गांधी यांच्या ४२ व्या स्मृतिदिनानिमित्त आणि सरदार वल्लभभाई पटेल यांच्या जयंतीनिमित्त भव्य अभिवादन कार्यक्रमाचे आयोजन करण्यात आले होते. याप्रसंगी उपस्थितांना संबोधित करताना बाळासाहेब थोरात बोलत होते.
आपल्या भाषणात पुढे बोलताना थोरात म्हणाले की, स्व. इंदिरा गांधी यांनी देशाची एकता आणि अखंडता कायम राखण्याला नेहमीच सर्वोच्च प्राधान्य दिले. स्वातंत्र्यानंतर पंडित जवाहरलाल नेहरू यांच्या मंत्रिमंडळात गृहमंत्री म्हणून काम करताना सरदार वल्लभभाई पटेल यांनी ५०० हून अधिक संस्थानांचे भारतात विलीनीकरण करून अखंड भारताची उभारणी केली. या दोन्ही थोर राष्ट्रपुरुषांचे विचार आत्मसात करून देशाची एकात्मता आणि अखंडता टिकवून ठेवण्यासाठी प्रत्येकाने कटिबद्ध राहण्याची गरज असल्याचे आवाहन त्यांनी यावेळी केले.
यावेळी माजी नगराध्यक्ष दुर्गाताई तांबे यांनी स्व. इंदिरा गांधी यांच्या आठवणींना उजाळा दिला. त्या म्हणाल्या की, सहकारमहर्षी भाऊसाहेब थोरात यांना इंदिराजींच्या खंबीर नेतृत्वाबद्दल नितांत आदर होता. पुढील पिढीला त्यांच्या कार्यातून सतत प्रेरणा मिळावी यासाठीच नवी दिल्लीच्या धर्तीवर अमृत उद्योग समूहामध्ये ‘शक्तीस्थळ’ची उभारणी करण्यात आली आहे. सुरुवातीच्या काळात विरोधकांनी त्यांना ‘गुंगी गुडीया’ म्हणून हिणवले असले, तरी आपल्या पराक्रमाने आणि कर्तृत्वाने त्यांनी जागतिक पटलावर भारताचा नवा ठसा उमटवला.
या अभिवादन प्रसंगी स्व. इंदिरा गांधी आणि सरदार वल्लभभाई पटेल यांना भावपूर्ण मानवंदना देण्यात आली. कार्यक्रमास कारखान्याचे व्हाईस चेअरमन पांडुरंग घुले, रामहरी कातोरे, ॲड. नानासाहेब शिंदे यांच्यासह सहकारातील विविध संस्थांचे पदाधिकारी कार्यकर्ते उपस्थित होते.
