महाराष्ट्र संवाद न्यूज ऑनलाईन- रायगड जिल्ह्यातील कर्जत तालुका आणि भीमाशंकर परिसरातील शेकडो एकर जंगल कथित प्रकल्पाच्या नावाखाली नष्ट केले जात असल्याचा गंभीर आरोप करत, या विनाशकारी जंगलतोडीला तात्काळ स्थगिती देण्याची जोरदार मागणी संगमनेर तालुक्यातील पर्यावरणवादी कार्यकर्त्यांनी केली आहे.
या संदर्भात अनेक स्थानिक कार्यकर्त्यांच्या स्वाक्षरीने राज्याचे मुख्यमंत्री देवेंद्र फडणवीस यांना संगमनेरचे प्रांताधिकारी अरुण उंडे यांच्यामार्फत निवेदन सादर करण्यात आले असून या संपूर्ण प्रकरणाची उच्चस्तरीय चौकशी करण्याची मागणी करण्यात आली आहे.
निवेदनात नमूद केल्यानुसार, सध्या संपूर्ण महाराष्ट्रात वाढते तापमान, पाण्याची तीव्र टंचाई आणि दुष्काळसदृश परिस्थितीमुळे जनता होरपळून निघत आहे. यंदाच्या उन्हाळ्यात राज्यातील अनेक भागांत तापमान ४५ ते ५० अंश सेल्सिअसपर्यंत पोहोचले असून नैसर्गिक पाण्याचे स्त्रोत आटत चालले आहेत. अशा अत्यंत गंभीर परिस्थितीत विकासाच्या नावाखाली निसर्गाचा विनाश करणे चिंताजनक असून यामुळे स्थानिक पर्यावरण, जैवविविधता आणि वन्यजीवांचे अधिवास धोक्यात आल्याचे कार्यकर्त्यांनी स्पष्ट केले.
या गंभीर समस्येवर तोडगा काढण्यासाठी कार्यकर्त्यांनी प्रशासनासमोर महत्त्वाच्या मागण्या मांडल्या आहेत. यामध्ये कर्जत व भीमाशंकर परिसरातील सुरु असलेली कथित जंगलतोड तात्काळ थांबवणे, या प्रकल्पासाठी करण्यात येणारी वृक्षतोड, पर्यावरणीय मंजुरी व वनविषयक परवानग्यांची उच्चस्तरीय चौकशी करणे समाविष्ट आहे.
तसेच नियमानुसार सर्व कायदेशीर परवानग्या मिळाल्याची खातरजमा करूनच पुढील कार्यवाही करावी, स्थानिक नागरिक व तज्ज्ञांची मते विचारात घेऊन प्रकल्पाचे निष्पक्ष पुनर्मूल्यांकन करावे आणि नियमांचे उल्लंघन करणाऱ्यांवर कठोर कारवाई करावी, अशी ठाम भूमिका घेण्यात आली आहे.
निसर्ग आणि जंगलांचे संरक्षण करणे ही काळाची गरज असून आज आपण योग्य पावले उचलली नाहीत, तर पुढील पिढ्यांना भीषण पाणीटंचाई आणि तीव्र हवामान बदलाचा सामना करावा लागेल, असा इशाराही यावेळी देण्यात आला.
या निवेदनावर रवींद्र दिवे, ओंकार बिडवे, जयसिंग सहाने, रामू चन्ना, संदीप काकड, विश्वनाथ भुजबळ, अनिकेत घुले, समीर लामखडे, सचिन साळवे, रजत अवसक, किसनभाऊ हासे, हिरालाल पगडाल, कैफ तांबोळी, बादशहा सोनवणे आदी पर्यावरणप्रेमी व स्थानिक कार्यकर्त्यांच्या स्वाक्षऱ्या आहेत.
