महाराष्ट्र संवाद न्यूज ऑनलाईन- संगमनेर शहरातील बाजारपेठेतील मर्चंट बँकेच्या मध्यरात्री वाजू लागलेल्या कर्णकर्कश सायरनमुळे त्रस्त झालेल्या रहिवाशांनी पोलिसांच्या मदतीने अलार्म बंद करायला लावला असून, मोबाईलवर अलर्ट जात असतानाही बराच वेळ दुर्लक्ष झाल्याचा संतापजनक प्रकार समोर आला आहे.
स्थानिक नागरिकांनी दिलेल्या माहितीनुसार, संगमनेर शहरातील मुख्य बाजारपेठेत असलेल्या मर्चंट बँकेच्या सुरक्षा यंत्रणेतील तांत्रिक बिघाडामुळे रात्रीच्या शांततेत कर्णकर्कश सायरन वाजत असल्यामुळे परिसरातील नागरिकांची मोठी झोपमोड होत आहे. विशेष म्हणजे, या अलार्मचे थेट अलर्ट बँकेच्या संचालक मंडळाच्या मोबाईलवर जात असल्याचे सांगितले जाते. असे असतानाही कुणीही गांभीर्याने घेत नाही, यामुळे नागरिकांमधून तीव्र संताप व्यक्त होत आहे.
मध्यरात्री अडीच वाजता बाजारपेठ शाखेतील सायरन वाजू लागल्याने त्रस्त झालेल्या जागरूक नागरिकांनी थेट ११२ क्रमांकावर फोन करून पोलिसांना बोलावून घेतले, त्यानंतर तब्बल एका तासाने पहाटे साडेतीन वाजता हा सायरन बंद करण्यात आला. रात्री-अपरात्री होणाऱ्या या प्रचंड आवाजामुळे परिसरातील लहान मुले, वृद्ध आणि नागरिकांच्या आरोग्यावर परिणाम होत असून त्यांना नाहक मानसिक त्रासाचा सामना करावा लागत आहे.
बँकेच्या या बेजबाबदार कारभारामुळे स्थानिकांमध्ये तीव्र असंतोष पसरला असून, तातडीने ही तांत्रिक त्रुटी दूर करण्याची मागणी करण्यात आली आहे.
