आमची शाळा कोणत्याही कॉन्व्हेंटपेक्षा कमी नाही! जिल्हा परिषद शाळेच्या मुख्याध्यापिकेने अशी बदलली शाळेची रूपरेषा, वृषाली कडलग यांना ‘आयडॉल शिक्षक पुरस्कार’ जाहीर

महाराष्ट्र संवाद न्यूज ऑनलाईन-
अकोले तालुक्यातील गणोरे येथील शिंदेवाडी जिल्हा परिषद शाळेच्या मुख्याध्यापिका वृषाली सुनील कडलग यांना राज्य शैक्षणिक संशोधन व प्रशिक्षण परिषदेतर्फे (SCERT) २०२६-२७ चा प्रतिष्ठेचा ‘आयडॉल शिक्षक पुरस्कार’ जाहीर झाला. त्यांनी लोकसहभागातून तब्बल २२ लाखांचा निधी उभारून शाळेचा कायापालट केला आहे.
शिंदेवाडी, गणोरे (ता. अकोले) येथील जिल्हा परिषद प्राथमिक शाळेच्या उपक्रमशील मुख्याध्यापिका वृषाली कडलग यांनी ग्रामीण भागातील शेतकरी आणि कष्टकरी कुटुंबांतील विद्यार्थ्यांना गुणवत्तापूर्ण शिक्षण देण्यासाठी सातत्याने नाविन्यपूर्ण उपक्रम राबवले आहेत. अध्यापनासोबतच शाळेच्या भौतिक विकासासाठी त्यांनी माजी विद्यार्थ्यांचा व्हॉट्सॲप ग्रुप तयार करून आवाहन केले, याला ग्रामस्थ आणि दानशूर व्यक्तींनी उत्स्फूर्त प्रतिसाद देत सुमारे २२ लाख रुपयांचा लोकसहभाग मिळवून दिला.
या निधीतून शाळेत आधुनिक बेंच, इंटरॲक्टिव्ह बोर्ड, संगणक, इन्व्हर्टर, सीसीटीव्ही कॅमेरे, परसबाग, बोलक्या भिंती आणि सुसज्ज वाचनालय यांसारख्या अत्याधुनिक सुविधा उभारण्यात आल्या आहेत. तसेच सेंट्रल बँक ऑफ इंडिया व उमंग फाउंडेशनच्या सीएसआर निधीतून संरक्षक भिंत आणि स्वच्छतागृहाचे बांधकाम झाले आहे. त्यांच्या या उल्लेखनीय शैक्षणिक कार्याची दखल घेत यापूर्वी त्यांना क्रांतीज्योती सावित्रीबाई फुले राज्य शिक्षक गुणगौरव पुरस्कार आणि डॉ. ए. पी. जे. अब्दुल कलाम शिक्षक पुरस्काराने सन्मानित करण्यात आले असून, आता जाहीर झालेल्या आयडॉल शिक्षक पुरस्कारामुळे त्यांच्या शिरपेचात आणखी एक मानाचा तुरा रोवला गेला आहे.
या शैक्षणिक वाटचालीत पंचायत समिती अकोलेचे गटशिक्षणाधिकारी दीपक धुमाळ, देवठाण बीटचे विस्तार अधिकारी अनिल गायकवाड, खिरविरे बीट शिक्षण विस्तार अधिकारी ज्ञानेश्वर माळवे आणि गणोरे केंद्राचे केंद्रप्रमुख नितीन पवार यांचे त्यांना मार्गदर्शन लाभले. पुरस्काराबद्दल शिंदेवाडी शाळा व्यवस्थापन समितीचे अध्यक्ष दिगंबर दातीर, उपाध्यक्ष प्रियांका अमोल हांडे तसेच सहकारी शिक्षिका कल्पना पाटील यांनी त्यांचे अभिनंदन केले आहे.
ग्रामीण भागातील विद्यार्थ्यांना गुणवत्तापूर्ण शिक्षण, आधुनिक सुविधा आणि उज्ज्वल भविष्याच्या संधी उपलब्ध करून देण्यासाठी कडलग यांनी केलेले कार्य शिक्षकांसाठी आणि समाजासाठी प्रेरणादायी ठरत आहे.