शिक्षण क्षेत्राची मान उंचावणारी बातमी! संगमनेरच्या या लेखकाच्या चार पुस्तकांचा शासनमान्य ग्रंथ निवडसुचित समावेश; वाचा सविस्तर

महाराष्ट्र संवाद न्यूज ऑनलाईन-
महाराष्ट्र शासनाच्या ग्रंथालय संचालनालयाच्या वतीने २०२४ या वर्षासाठीची शासनमान्य ग्रंथ निवडसूची नुकतीच जाहीर करण्यात आली आहे. या अधिकृत यादीत संगमनेर येथील प्रसिद्ध लेखक, पत्रकार आणि शिक्षण अभ्यासक संदीप वाकचौरे यांच्या चार पुस्तकांचा एकाच वेळी समावेश करण्यात आल्याने अहमदनगर जिल्ह्यासह संपूर्ण राज्याच्या शैक्षणिक वर्तुळातून त्यांच्यावर अभिनंदनाचा वर्षाव होत आहे.
पुण्याच्या प्रसिद्ध ‘चपराक प्रकाशन’ने प्रकाशित केलेल्या ‘शिक्षण नामा’, ‘परिवर्तनाची वाट’, ‘विनोबाची शिक्षण छाया’ आणि ‘शिक्षण शोध’ या चारही पुस्तकांची निवड राज्य शासनाच्या ग्रंथ निवड समितीने केली आहे. एकाच लेखकाची, एकाच विषयावरील आणि एकाच प्रकाशकाची चार पुस्तके एकाच वेळी शासनमान्य सूचीत समाविष्ट होण्याची ही दुर्मीळ घटना मानली जात आहे.
संदीप वाकचौरे यांनी गेल्या अनेक वर्षांपासून शिक्षण या एकाच विषयाला वाहून घेत महाराष्ट्रातील विविध प्रमुख वृत्तपत्रांमधून सातत्याने प्रगल्भ स्तंभलेखन केले आहे. वाकचौरे यांची आतापर्यंत सुमारे वीस पुस्तके प्रकाशित झाली असून त्यांपैकी तब्बल १७ पुस्तके एकट्या चपराक प्रकाशनाने बाजारात आणली आहेत. विशेष म्हणजे, त्यांच्या अनेक पुस्तकांना यापूर्वीही शासनमान्य यादीत स्थान मिळाले आहे.
या पुस्तकांना महाराष्ट्राचे माजी शिक्षण संचालक शिवाजीराव तांबे, डॉ. शकुंतला काळे, दिनकर पाटील, दिनकर टेमकर, ज्येष्ठ शिक्षण विचारवंत ह. ना. जगताप, यशवंतराव चव्हाण महाराष्ट्र मुक्त विद्यापीठाचे कुलगुरू डॉ. संजीव सोनवणे आणि शिक्षण अभ्यासक नामदेव माळी यांसारख्या शिक्षण क्षेत्रातील दिग्गजांच्या प्रस्तावना लाभल्या आहेत.
राज्य ग्रंथालय संचालक अशोक गाडेकर यांच्या मार्गदर्शनाखाली आणि निवड समितीचे अध्यक्ष तथा ज्येष्ठ नाटककार अभिराम भडकमकर यांच्यासह इतर सदस्यांनी या ग्रंथांची अंतिम निवड केली आहे. एकाच वेळी चार पुस्तकांची निवड झाल्याबद्दल संगमनेरसह राज्यभरातील शैक्षणिक आणि साहित्यिक वर्तुळातून वाकचौरे व चपराक प्रकाशनाचे कौतुक केले जात आहे.