शुक्रवार, दिनांक १४ जून २०२५
तब्बल २९१ कोटी रुपयांच्या नगर अर्बन बँकेतील आर्थिक घोटाळ्याप्रकरणी नगरच्या आर्थिक गुन्हे शाखेने पुण्यातून बँकेच्या एका अधिकाऱ्याला ताब्यात घेतले आहे.
राजेंद्र केशव डोळे (रा. सातारा) असे ताब्यात घेतलेल्या आरोपीचे नाव आहे. ताब्यात घेतलेल्या आरोपीकडून काय माहिती समोर येते हे लवकरच समजणार आहे. डोळे याला पुण्यातून गुरुवारी दुपारी ताब्यात घेण्यात आले असून रात्री उशिराने त्याला नगरमध्ये आणण्यात आले होते.
आर्थिक घोटाळा प्रकरणी राजेंद्र गांधी यांनी दिलेल्या फिर्यादीवरून व त्या पाठोपाठ आलेल्या फॉरेनसिक ऑडिटच्या अहवालानुसार आर्थिक गुन्हे शाखेकडून संशयित आरोपींची चौकशी सुरू आहे. यातील काही संचालक, अधिकारी व कर्जदारांना गुन्हे शाखेने अटक केली असून काही अधिकाऱ्यांचे जबाब देखील या प्रकरणी नोंदविण्यात आले आहे. तर काहींना न्यायालयाने जामीनावर सोडले आहे. गुरुवारी देखील न्यायालयाने या प्रकरणी पाच आरोपींच्या जामीन अर्ज फेटाळून लावले होते.
डोळे बँकेच्या मुख्यालयात कर्ज विभागात छाननी अधिकारी होते. त्यामुळे त्यांच्यावर देखील संशय असल्याने त्यांना आर्थिक गुन्हे शाखेने ताब्यात घेतले असून चौकशीनंतर गुन्ह्यात त्यांचा सहभाग असल्याचे निष्पन्न झाल्यास त्यांना अटक करण्यात येईल, अशी माहिती तपास अधिकारी पोलीस उपअधीक्षक अमोल भारती यांनी दिली.
