सोमवार १५ जुलै
६५ वर्षापेक्षा अधिक वय असलेल्या आणि १४ वर्षापेक्षा अधिक शिक्षा भोगलेल्या आरोपीला सोडून देण्यासाठी आवश्यक असणारे फिटफॉर सर्टिफिकेट देण्याकरिता तीस हजार रुपयांची लाच घेणाऱ्या नासिकमधील मध्यवर्ती कारागृहातील वैद्यकीय अधिकाऱ्यासह मुख्य वैद्यकीय अधिकाऱ्यास एसीबीने रंगेहाथ पकडले आहे.
डॉ. आबिद आबू अत्तार (वय ४०, वर्ग- १ पद – मुख्य वैदयकिय अधिकारी, मध्यवर्ती कारागृह नाशिकरोड रा. मध्यवर्ती कारागृह वसाहत, नाशिकरोड) व डॉ. प्रशांत एकनाथ खैरनार (वय ४२, वर्ग-२ पद- वैदयकिय अधिकारी, मध्यवर्ती कारागृह नाशिकरोड रा. इंदिरानगर, नाशिक) अशी लाच घेणाऱ्या दोघा डॉक्टरांची नावे असून दोघांनाही अटक करण्यात आली आहे. नाशिकच्या एसीबीने रविवारी ही कारवाई केली.
अधिक माहिती अशी, एसीबीकडे तक्रार करणाऱ्या तक्रारदाराचे मित्र नाशिकच्या मध्यवर्ती कारागृहात शिक्षा भोगत असून, शासकिय नियमाप्रमाणे ज्या बंदी कैदीचे वय ६५ वर्षापेक्षा जास्त आहे तसेच ज्या कैद्याने १४ वर्षे शिक्षा भोगलेली आहे अशा, कैदांना शासनाने नेमून दिलेली समिती सोडून देते. परंतु अशा कैदांना बाहेर सोडण्याकरीता मुख्य वैद्यकिय अधिकारी यांचे फिटफॉर सर्टिफिकेटची गरज असते.
म्हणून अत्तार व खैरनार यांनी तक्रारदार यांचे मित्र यांना फिटफॉर सर्टिफिकेट देण्यासाठी तक्रारदार यांचेकडे सुरुवातीला ४०,००० रुपयांची मागणी केली. तडजोडीअंती ३०,००० रुपयांची मागणी करून ही लाचेची रक्कम स्वीकारताना त्यांना रंगेहाथ पकडण्यात आले.
दोन्ही डॉक्टरांविरोधात नाशिक रोड पोलीस ठाण्यात लाचलुचपत प्रतिबंधक कायद्यान्वये रविवारी रात्री गुन्हा दाखल करण्यात आला आहे. पोलीस अधीक्षक शर्मिष्ठा वालावलकर, अपर अधीक्षक माधव रेड्डी, अपर अधीक्षक नरेंद्र पवार यांच्या मार्गदर्शनाखाली पोलीस निरीक्षक स्वप्नील राजपूत, राजेंद्र सानप, पोलीस हवालदार प्रभाकर गवळी, प्रफुल्ल माळी, संतोष गांगुर्डे, पोलीस नाईक किरण धुळे यांनी केली.
