बुधवार,१७ जुलै
भावाची मुलगी सून म्हणून घरात आणली. विवाह संबंधातून काही दिवसांनी ती गर्भवती राहिली. बाळंतपणासाठी तिला तीन-चार दिवसांपूर्वी लोणी येथील प्रवरा रुग्णालयात दाखल करण्यात आले. दरम्यान तिला मुलगीदेखील झाली, मात्र त्यानंतर जे समोर आले त्यातून दोन्ही कुटुंबातील पाच जणांवर घारगाव पोलीस ठाण्यात बलात्कार, बालविवाह प्रतिबंधक कायदा आणि पोक्सो अंतर्गत गुन्हा दाखल करण्यात आला आहे.
लोणी येथील रुग्णालयात बाळंतपणासाठी दाखल करतेवेळी दाखल केलेल्या कागदपत्र आणि इतर बाबींवरून गर्भवतीचे वय कमी असल्याचे व ती अल्पवयीन डॉक्टरांच्या लक्षात आले. ती अल्पवयीन असताना तिचा विवाह झाल्याचे डॉक्टरांच्या निदर्शनास आले त्यांनी ही बाब पोलिसांना कळविली. दरम्यानच्या काळात तिचे बाळंतपण होऊन तिला मुलगीदेखील झाली.
या संदर्भात घारगाव पोलिसांनी सदर मुलीच्या जबाबावरून संगमनेर तालुक्यातील पठार भागातील रहिवासी असलेल्या मुलीच्या पतीसह, सासू-सासऱ्यांवर आणि पीडित मुलीच्या आई-वडिलांवर गुन्हा दाखल केला आहे. दरम्यान हा बालविवाह लावणाऱ्या भटजीचादेखील पोलीस शोध घेत असल्याची माहिती समोर आली आहे.
आत्याच्या मुलाशी घराच्या दारासमोरच मंडप टाकून विवाह करण्यात आल्याचे अल्पवयीन मातेने पोलिसांना आपल्या जबाबात सांगितले. त्यामुळे दोन्ही कुटुंबातील पाच जणांविरोधात गुन्हा दाखल करण्यात आल्याने अल्पवयीन विवाहाचे नवीन प्रकरण संगमनेरात समोर आले आहे.
