बुधवार, २४ जुलै
चौदा वर्षीय अल्पवयीन मुलीने लोणीच्या पीएमटी रुग्णालयात एका गोंडस मुलीला जन्म दिल्यानंतर धक्कादायक माहिती समोर आली आहे. त्यानंतर अल्पवयीन मातेने दिलेल्या तक्रारीवरून आरोपी विरोधात बलात्कार, पोक्सोसह विविध कलमाअंतर्गत गुन्हा दाखल करण्यात आला असून आरोपीला संगमनेरच्या जिल्हा व अतिरिक्त सत्र न्यायालयाने पाच दिवसांची पोलीस कोठडी सुनावली आहे.
संगमनेर तालुक्याच्या पूर्व भागात राहणाऱ्या अल्पवयीन मातेने या संदर्भात संगमनेर तालुका पोलीस ठाण्यात दिलेल्या तक्रारीवरून ज्ञानेश्वर संपत उर्फ सोपान बोडखे (वय ३६, रा. तळेगाव दिघे, संगमनेर) याच्याविरोधात भारतीय दंड विधान कलम ३७६(२)(N), ३७६(३) सह बालकांचे लैंगिक अत्याचार प्रतिबंधक कायदा २०१२ चे कलम ४, ६ प्रमाणे गुन्हा दाखल करण्यात आला आहे.
पोलिसांनी आरोपीला मंगळवारी संध्याकाळी सहा वाजता अटक केली असून त्याला तपासी अधिकारी पोलीस उपनिरीक्षक एस. एस. सातपुते यांनी संगमनेरच्या जिल्हा अतिरिक्त सत्र न्यायालयासमोर उभे करत तपासाकामी पोलीस कोठडीची मागणी केली असता जिल्हा न्यायाधीश दिलीप घुमरे यांनी आरोपी बोडखे आला २९ जुलैपर्यंत पोलीस कोठडीत ठेवण्याचे आदेश दिले आहेत.
या संदर्भात अधिक माहिती अशी, आरोपी ज्ञानेश्वर संपत उर्फ सोपान बोडखे यांने गेल्या वर्षी एका अल्पवयीन मुलीवर वारंवार अत्याचार केला. तिच्याशी ठेवलेल्या शरीर संबंधातून ती गर्भवती राहिली. प्रसूतीसाठी तिला लोणीच्या पीएमटी रुग्णालयात दाखल करण्यात आले होते. तेथे तिने एका मुलीला जन्म दिला. त्यानंतर आरोपी विरोधात संगमनेर तालुका पोलीस ठाण्यात दिलेल्या तक्रारीवरून सोमवारी (२२ जुलै) गुन्हा दाखल करण्यात आला आहे.
आधीही एका अल्पवयीन मुलीच्या प्रकरणात आरोपी जामीनावर… पोलीस करणार जामीन रद्द करण्याची मागणी
दरम्यान आरोपीकडे दोन दिवस शेतमजुरीचे काम करणारी पंधरा वर्षीय अल्पवयीन मुलगी रात्री घरात झोपलेली असताना आरोपी ज्ञानेश्वर बोडखे याने तिच्या खोलीत जात तिच्याशी झटून जबरदस्ती करण्याचा प्रयत्न केला होता. या संदर्भातील संगमनेर तालुका पोलीस ठाण्यात पीडित अल्पवयीन मुलीने दिलेल्या तक्रारीवरून १८ मे २०१७ रोजी भारतीय दंड विधान कलम ३६३, ३५४(अ)(१)(२) तसेच बाल लैंगिक अपराधापासून संरक्षण कलम ७, ८ प्रमाणे गुन्हा दाखल असून या गुन्ह्यात त्याला न्यायालयाकडून जामीन मंजूर झाला आहे. हा जामीन रद्द करण्याची मागणी देखील तपास अधिकाऱ्यांकडून न्यायालयात केली जाण्याची शक्यता वर्तवली जात आहे.
