शुक्रवार, ०२ ऑगस्ट
मुख्यमंत्री माझी लाडकी बहीण योजनेसाठी नगर जिल्ह्यातून सात लाख महिलांचे अर्ज ऑनलाईन प्राप्त झाले आहे. प्राप्त झालेल्या या अर्जांची छाननी करण्यासाठी स्वतंत्र कक्षाची स्थापना करण्यात आली असून प्रभारी जिल्हाधिकारी आशिष येरेकर यांनी या कक्षाला भेट दिल्याची माहिती महिला व बालकल्याण विभागाचे जिल्हा कार्यक्रमाधिकारी मनोज ससे यांनी दिली आहे.
नगर जिल्ह्यात मुख्यमंत्री माझी लाडकी बहीण योजनेची गतीने अंमलबजावणी करण्यासाठी जिल्हाधिकारी व जिल्हा परिषदेचे मुख्य कार्यकारी अधिकारी यांच्या मार्गदर्शनाखाली दोन दिवस विशेष मोहीम राबविण्यात आली. या मोहिमेचा दैनंदिन आढावा, तालुकास्तरावर अधिकारी कर्मचाऱ्यांनी केलेल्या नियोजन यामुळे सात लाख महिलांचे अर्ज भरून घेण्यात यश आले आहे.
अर्जाच्या छाननी साठी स्वतंत्र कक्ष…
योजनेत प्राप्त झालेल्या महिलांच्या अर्जांची छाननी जलद गतीने करण्यासाठी जिल्हा परिषदेचे मुख्य कार्यकारी अधिकारी यांनी तालुका स्तरावर तहसीलदार, गट विकास अधिकारी, बाल विकास प्रकल्प अधिकाऱ्यांच्या देखरेखीखाली स्वतंत्र कक्ष सुरू करण्याच्या सूचना दिल्या होत्या. त्यानंतर तालुकास्तरावर स्वतंत्र छाननी कक्षाची स्थापना करण्यात आली असून दोन-तीन शिफ्ट मध्ये सर्व कर्मचारी या कक्षातून अर्जाच्या छाननीचे काम युद्धपातळीवर करत आहे.
कक्षाला प्रभारी जिल्हाधिकाऱ्यांची भेट…
अर्ज छाननी साठी सुरू केलेल्या नगर तालुक्यातील छाननी कक्षा प्रभारी जिल्हाधिकारी तथा जिल्हा परिषदेचे मुख्य कार्यकारी अधिकारी यांनी प्रत्यक्ष भेट देत कामकाजाची पाहणी केली. योजनेअंतर्गत ४३ हजार ७११ लाभार्थ्यांना पोर्टलवर मान्यता देण्यात आले असून योजनेचा अधिक लाभार्थ्यांनी लाभ घेण्याच्या आवाहन येरेकर यांनी केले आहे.
