रविवार, २५ ऑगस्ट
भांडण सोडविण्यासाठी गेलेल्या सहाय्यक पोलीस निरीक्षकावर पुण्यात कोयता गॅंगने कोयत्याने जीवघेणा हल्ला केल्याची घटना रविवारी साडेचार वाजण्याच्या सुमारास पुण्याच्या रामटेकडी भागात घडली आहे. हल्ल्यात गंभीर जखमी झालेल्या सहाय्यक पोलीस निरीक्षकाला उपचारासाठी रुग्णालयात दाखल करण्यात आले असून यामुळे पोलीस दलात खळबळ उडाली आहे.
रत्नदीप गायकवाड असे हल्ल्यात जखमी झालेल्या सहाय्यक पोलीस निरीक्षकाचे नाव असून दोन्ही हल्लेखोर आरोपी अल्पवयीन आहे. दोघेही पोलिसांच्या रेकॉर्डवरील आरोपी आहे. यातील एकावर वीस तर दुसऱ्यावर चौदा गंभीर स्वरूपाचे गुन्हे दाखल आहेत.
पुण्याच्या रामटेकडी भागात दोन टोळ्यांमध्ये हाणामारी सुरू होती. या हाणामारीची माहिती मिळाल्यानंतर सहाय्यक पोलीस निरीक्षक गायकवाड घटनास्थळी गेले होते. गुंडांना पकडत असताना अचानकपणे कोयता गॅंगने यांच्यावर हल्ला केला. गायकवाड यांच्या डोक्यात गुंडांनी कोयता मारला. यात ते गंभीर जखमी झाले असून त्यांना उपचारासाठी रुग्णालयात दाखल करण्यात आले आहे.
याप्रकरणी हल्ला करणाऱ्या दोघा गुन्हेगारांवर गुन्हा दाखल करण्यात आला असून फरार झालेल्या दोन्ही आरोपींचा शोध घेण्याचे काम सुरू आहे. कोयता गॅंगने थेट पोलिसांवर हल्ला केल्याने पुण्यात कायदा व सुव्यवस्थेचा प्रश्न उभा राहिला आहे. दरम्यान याप्रकरणी पोलीस आयुक्त वानवडी पोलीस ठाण्यात जाऊन घटनेची माहिती घेणार आहेत.
