बुधवार, २८ ऑगस्ट
शाळेत विद्यार्थिनी गैरवर्तन केल्याप्रकरणी चार महिन्यांपूर्वी न्यायालयात आरोप सिद्ध झालेल्या प्राथमिक शिक्षकाला जिल्हा परिषदेचे मुख्य कार्यकारी अधिकारी आशिष येरेकर सेवेतून बडतर्फ केले आहे.
मदन रंगनाथ दिवे असे कारवाई झालेल्या या प्राथमिक शिक्षकाचे नाव आहे. डिसेंबर २०२२ मध्ये राहुरी तालुक्यात जिल्हा परिषदेच्या शाळेवर उपाध्यापक म्हणून कार्यरत असलेल्या शाळेतील विद्यार्थिनी सोबत गैरवर्तन केल्याचा प्रकार घडला होता. याप्रकरणी राहुरी पोलीस ठाण्यात दिवे याच्याविरुद्ध भारतीय दंड संहिता कलम ३५४(अ), बाल लैंगिक अत्याचार प्रतिबंधक कायद्यान्वये गुन्हा दाखल करण्यात आला होता.
या प्रकरणात शिक्षक दिवे याला पोलिसांनी अटक देखील केली होती. त्यामुळे संबंधित शिक्षकावर जिल्हा परिषदेने निलंबनाची कारवाई केली होती. न्यायालयीन खटल्या दरम्यान दिवे गुन्ह्यात दोषी आढळल्याने न्यायालयाने त्याला १८ एप्रिल २०२४ रोजी तीन वर्ष सक्तमजुरी, १ लाख रुपये दंड आणि दंड न भरल्यास सहा महिने कारावासाची शिक्षा ठोठावली होती.
दुसरीकडे जिल्हा परिषदेने ही या शिक्षकावर बडतर्फीचा बडगा उगारला असून मुख्य कार्यकारी अधिकारी आशिष येरेकर यांनी या शिक्षकाला सोमवारी (२६ ऑगस्ट) शिक्षकी सेवेतून बडतर्फ केले आहे.
