डॉ. जयश्री थोरात यांच्याबद्दल आक्षेपार्ह वक्तव्य करणाऱ्या वसंत देशमुखला अटक, एलसीबीने पुण्यात पकडले!

रविवार, २७ ऑक्टोबर
विधानसभा निवडणुकीमुळे राज्यात सर्वत्र राजकीय वातावरण तापले असताना संगमनेरमध्ये मात्र पारंपारिक विरोधक थोरात-विखे यांच्यातील राजकीय संघर्ष उफाळून आला आहे. या संघर्षाला कारणीभूत ठरलेल्या आणि डॉ. जयश्री थोरात यांच्याबद्दल आक्षेपार्ह वक्तव्य करून फरार झालेल्या वसंत देशमुखला अहिल्यानगर एलसीबीच्या पुण्यात पकडले आहे.नगर दक्षिणचे माजी खासदार सुजय विखे पाटील यांच्या युवा संकल्प मेळाव्यात वसंत देशमुख याने अध्यक्ष स्थानावरून बोलताना माजी मंत्री आमदार बाळासाहेब थोरात यांच्या कन्या डॉ. जयश्री यांच्या विषयी आक्षेपार्ह वक्तव्य केले होते. महिलेविषयी केलेल्या अवमानकारक वक्तव्यामुळे राज्यात संतापाची लाट निर्माण झाली.शनिवारी (दि.२६) वसंतराव देशमुखांविरोधात गुन्हा दाखल करण्यात आला होता. तेव्हापासून ते फरार होते. देशमुख यास अटक करण्यात यावी या मागणीसाठी जयश्री थोरात यांच्यासह काँग्रेस कार्यकर्त्यांनी पोलीस ठाण्यासमोर ठिय्या आंदोलन केलं होतं. सभेमध्ये डॉ. थोरात यांच्याविषयी आक्षेपार्ह विधान केल्यामुळे आता भाजप नेते वसंत देशमुख यांना पोलिसांनी पुण्यातून ताब्यात घेतलं आहे. देशमुख याला संगमनेर तालुका पोलिसात हजर केल्यानंतर अटक करून न्यायालयासमोर हजर केले जाणार असल्याची माहिती समोर येत आहे.दरम्यान भारतीय जनता पक्षाचे प्रदेशाध्यक्ष चंद्रशेखर बावनकुळे यांनी देखील वसंतराव देशमुख यांच्या वक्तव्याचा तीव्र विरोध करत कडक कारवाई करण्यात येईल असे म्हटले आहे.