शनिवार, १६ नोव्हेंबर
विधानसभा निवडणूक प्रचार अंतिम टप्प्यात आला आहे. अशातच अहिल्यानगरमध्ये नाकाबंदी दरम्यान कोतवाली पोलिसांच्या पथकाने एका स्कार्पिओतून दोन लाख रुपयांची रोकड हस्तगत केली. विशेष म्हणजे ही स्कार्पिओ श्रीगोंद्याच्या महाविकास आघाडीच्या ठाकरे गटाचे उमेदवार अनुराधा नागवडे यांच्या कुटुंबीयांची असल्याची माहिती समोर येत असून या स्कार्पिओमध्ये नागवडे यांचा मुलगा देखील होता.
अहिल्यानगर जिल्ह्यात राज्यातील महत्त्वपूर्ण लढतींचा समावेश आहे. त्यामुळे या महत्त्वपूर्ण लढती असलेल्या मतदारसंघांमध्ये मोठ्या प्रमाणात पैशाचा वापर सुरू असल्याचे समोर येत आहे. उमेदवाराला पक्षाकडून कोट्यावधी रुपयांचा निधी मिळाल्याचे देखील चर्चा मतदारसंघांमध्ये सुरू आहे. अशातच नागवडे यांच्या पुत्रासह काहीजणांना रोकड रक्कम कोणत्याही पुराव्याशिवाय जवळ बाळगताना पकडण्यात आले आहे. 
श्रीगोंदा मतदार संघामध्ये महाविकास आघाडी आणि महायुतीच्या उमेदवारांमध्ये जोरदार रस्सीखेच सुरू आहे. मिळालेल्या माहितीनुसार, अहिल्यानगर शहरातील आयुर्वेद कॉर्नर येथे पोलीस निरीक्षक प्रताप दराडे यांच्या नेतृत्वाखाली शुक्रवारी सुरू असलेल्या नाकाबंदी दरम्यान श्रीगोंदा येथील ठाकरे गटाच्या उमेदवार अनुराधा नागवडे यांच्या मालकीच्या एम.एच. १२ यु.व्ही. २५२५ या क्रमांकाच्या पकडलेल्या स्कार्पिओत दोन लाख रुपयांची रोकड पथकाला आढळून आली.
स्कार्पिओमधून नागवडे यांचा मुलगा दिग्विजय राजेंद्र नागवडे (वय २० वर्ष, रा. श्रीगोंदा), गणेश राजसिंह शिर्के (वय २६ वर्ष, रा. बाबुर्डी, ता. श्रीगोंदा), अविनाश बाळू इथापे (रा. श्रीगोंदा फॅक्टरी, श्रीगोंदा) व ईश्वर अंबर मेहत्रे (रा. आढळगाव, ता. श्रीगोंदा) हे चौघेजण जात होते. यातील तिघांकडे ही रोकड आढळून आली.
आढळून आलेल्या पैशासंदर्भात संबंधितांना पथकातील कर्मचाऱ्यांनी विचारणा केली असता त्यांच्याकडून समाधानकारक उत्तर मिळू शकले नाही. त्यामुळे पोलिसांनी सदरची रोकड आणि स्कार्पिओ ताब्यात घेतली आहे. तसेच सदर रक्कम चौकशीसाठी समितीकडे वर्ग करण्यात आली आहे. पोलीस निरीक्षक प्रताप दराडे यांनी ही माहिती दिली.
