रविवार, २४ नोव्हेंबर
राज्यातील जनतेचा स्पष्ट कौल मिळाल्यानंतर महायुतीने सरकार स्थापन करण्याचा हालचाली सुरू केल्या आहे. राज्यात सत्ता स्थापनेच्या हालचालींना वेग आला असून २६ नोव्हेंबर पूर्वी नव्या सरकारचा शपथविधी सोहळा पार पडेल.
या पार्श्वभूमीवर भारतीय जनता पक्ष, शिवसेना (शिंदे गट) राष्ट्रवादी काँग्रेस (अजित पवार गट) या पक्षांमध्ये बैठकांचे सत्र सुरू झाले आहे. नव्या मुख्यमंत्र्यांच्या नावाची घोषणा येत्या काही तासात होण्याची शक्यता असून उपमुख्यमंत्री पदी कोणाची वर्णी लागते याच्या देखील चर्चा सुरू झाल्या आहे. 
सत्ता स्थापन करण्याच्या दिशेने पाऊले टाकणाऱ्या राष्ट्रवादी काँग्रेस पक्षाच्या नवनिर्वाचित आमदारांची बैठक अजित पवारांच्या देवगिरी बंगल्यावर पार पडली आहे. या बैठकीमध्ये अजित पवार यांची राष्ट्रवादी काँग्रेसच्या गटनेतेपदी निवड करण्याचा महत्त्वपूर्ण निर्णय झाला आहे. नव्या सभागृहात अजित पवारांच्या राष्ट्रवादी काँग्रेसचे ४१ आमदार दिसणार असून एकनाथ शिंदे यांच्या शिवसेनेचे ५७ तर भाजपचे १३२ आमदार निवडून आले आहे एवढ्या मोठ्या प्रमाणात स्पष्ट बहुमत मिळाल्याने या बहुमताची इतिहासात नोंद होणार आहे.
