रविवार, १५ डिसेंबर
संगमनेर – अपघाताच्या ठिकाणी समजावून सांगण्यासाठी गेलेल्या दोघांना सात जणांकडून मारहाण करण्यात आली. या मारहाणीत अभियंत्यासह दोघेजण जखमी झाले आहेत. मारहाण करणाऱ्या आरोपींवर संगमनेर शहर पोलीस ठाण्यात गुन्हा दाखल करण्यात आला असून पोलीस पुढील तपास करत आहे.
संगमनेर शहरातील तीन बत्ती चौकाजवळील पेट्रोल पंपासमोर शनिवारी सायंकाळी साडेसात ते आठ वाजण्याच्या सुमारास झालेल्या अपघातावेळी मिलिंद बबन घुगे आणि अविनाश रोहिदास गुंजाळ हे दोघे समोरच्यांना समजावून सांगण्यासाठी गेले असता त्यांना बेदम मारहाण करण्यात आली. या मारहाणीत दोघेही गंभीर जखमी झाले आहे.
मारहाणीत आरोपींनी फिर्यादी आणि साक्षीदार यांना टनक वस्तूने, बेल्टने मारहाण केल्याचे समोर आले आहे. तसेच फिर्यादीचा मोबाईल फोडून टाकला आहे. साक्षीदार अविनाश गुंजाळ याच्या गळ्यातील सोन्याची चैन जबरीने नेण्यात आल्याचे तसेच जीवे मारण्याची धमकी देत शिवीगाळ केल्याची तक्रार जखमींनी केली आहे.
याप्रकरणी शहर पोलीस ठाण्यात जखमी सिव्हिल इंजिनियर मिलिंद बबन घुगे (रा. निमोण, ता. संगमनेर, जि. अहिल्यानगर) यांनी दिलेल्या तक्रारीवरून घाऱ्या आणि हुजेब (दोघांचेही पूर्ण नाव माहिती नाही) यांच्यासह इतर पाच जणांविरुद्ध भारतीय न्याय संहितेच्या विविध कलमांतर्गत गुन्हा दाखल करण्यात आला आहे.
