रविवार, ०५ जानेवारी
संगमनेर – परस्पर विरोधी तक्रारी पोलीस ठाण्यात दाखल करण्यात आल्याने अंतर्गत मतभेद आता पोलिसांपर्यंत पोहोचले असल्याचे बोलले जात आहे. केंद्रीय कृषिमंत्री शिवराजसिंह चौहान यांच्या दौऱ्यावेळी घडलेल्या प्रकारामुळे हा दौरा वादग्रस्त ठरला आहे.
रविवारी संगमनेर शहर पोलीस ठाण्यात सुयोग पंढरीनाथ गुंजाळ (रा. गुंजाळवाडी, संगमनेर) यांनी दिलेल्या फिर्यादीवरून दीपक भगत व साहेबराव वलवे यांच्या विरोधात भारतीय न्याय संहिता कलम ११५, ३५२, ३५२(२) प्रमाणे पोलिसांनी तक्रार दाखल करून घेतली आहे. परस्पर विरोधी तक्रारीमुळे पोलिस आता याप्रकरणी काय निर्णय घेणार याकडे लक्ष लागले आहे.
केंद्रीय मंत्री शिवराजसिंह चौहान नववर्षाच्या प्रारंभी २ जानेवारीला शनिशिंगणापूर येथून त्रंबकेश्वर येथे जात असताना काही काळ संगमनेरमध्ये थांबले होते. यावेळी भाजप पदाधिकाऱ्यांमध्ये हाणामारी झाली होती. या संदर्भात रुग्णालयात असलेल्या भाजप ओबीसी सेलचे जिल्हा उपाध्यक्ष दीपक भगत यांच्या तक्रारीवरून पोलीस ठाण्यात सुयोग गुंजाळ व राहुल भोईर या दोघांविरुद्ध गुन्हा दाखल करण्यात आला होता.
तर रविवारी या संदर्भात दुसरी परस्परविरोधी फिर्याद सुयोग गुंजाळ यांनी दिली असून यात त्यांनी म्हटले आहे की, केंद्रीय मंत्री शिवराजसिंह चौहान संगमनेर येथे आले असताना रात्री नऊ वाजण्याची सुमारास तेथे दारू पिऊन आलेल्या दीपक भगत व साहेबराव वलवे यांनी आमच्या मागील व्यक्तिगत वादातून मला व माझा मित्र राहुल होईल या धक्का देऊन आम्हास विनाकारण शिवीगाळ करण्यास सुरुवात केली. त्यांना समजावून सांगण्याचा प्रयत्न केला असता त्यांनी आम्हाला कुटुंबीयावरून अश्लील शिवीगाळ करून दोघांनाही जिवे मारून टाकू अशी धमकी दिली व आमची प्रतिष्ठा कमी करण्याचा प्रयत्न केला.
या तक्रारीवरून दीपक भगत व साहेबराव वलवे या दोघांविरुद्ध गुन्हा दाखल करण्यात आला आहे. पुढील तपास पोलीस हेड कॉन्स्टेबल पारधी करत आहेत.
