२० जानेवारीपासून दुकानासमोर बानोबी शेख करणार उपोषण
संगमनेर – संगमनेर नगर परिषदेच्या मालकीच्या मिळकतीवर अवैधरित्या सुरू असलेले दारू विक्रीचे दुकान बंद करण्याची मागणी करण्यात आली असून यासंदर्भात पालिका व राज्य उत्पादन शुल्क विभागाच्या प्रशासनाकडे वारंवार तक्रारी करून देखील दखल घेतली जात नसल्याने येत्या सोमवारपासून (२० जानेवारी) दुकान समोरील रस्त्यावर उपोषण करण्याचा इशारा देण्यात आला असून या उपोषणात सर्वपक्षीय कार्यकर्ते पदाधिकारी नागरिक सहभागी होणार आहे, अशी माहिती तक्रारकर्त्या बानोबी शेख यांनी दिली आहे.
दरम्यान या विषयावरून दोन दिवसांपूर्वी संगमनेर नगर परिषदेच्या अतिक्रमण हटाव मोहिमेवेळी या परिसरातील नागरिक, माजी नगरसेवकांनी मुख्याधिकारी तसेच पोलीस प्रशासनाला घेराव घालत संबंधित दुकानावर कारवाई करण्याची मागणी केली होती. होते कागदपत्र बनवत परवानगी मिळविल्या संदर्भात या दारू दुकानासंदर्भात धक्कादायक माहिती समोर येऊन देखील कारवाई करण्यास टाळाटाळ केली जात असल्याचा आरोप करत आपण उपोषणाचा मार्ग अवलंबत असल्याचे तक्रारकर्त्या महिलेने म्हटले आहे.
सागर वाईन हे दुकान गेल्या अनेक वर्षांपासून अवैधपणे सुरू असून याबाबत नगरपालिका प्रशासनला वारंवार अर्ज देऊनही कारवाई होत नाही, कारण खोट्या व बनावट कागदपत्रांच्या आधारे सदरील वाईन देशी दारु विक्री लायसन जिल्हाधिकारी कार्यालयातून मिळविलेले गेले आहे.
सदरील लायसन मिळविण्यासाठी लायसन धारकाने नगरपालिकेचे शिक्के, लेटर पॅड, त्याचप्रमाणे कराची पावती असे विविध दस्तावेज हे खोटे आणी बनावट पद्धतीने बनून लायसन मिळविणेकामी संबंधित कार्यालयाकडे सादर केले असल्याचा खुलासा नगरपालिकेने केलेला आहे. असे खोटे आणी बनावट शिक्के, लेटर व दस्तऐवज बनवणाऱ्यावर नगरपालिकेने योग्य ती कारवाई करावी, तसेच सदरील वाईन देशी दारू दुकानचे लायसन धारक यांनी शासनाला खोटे कागदपत्र देऊन सरकारी जागेवरती अतिक्रमण करून देशी दारूचे दुकान खोट्या लायसनवर आजपर्यंत चालवत आहे,
दारुबंदी विभाग अहिल्यानगर व जिल्हाधिकारी अहिल्यानगर अशा या दोन्ही विभागांची व शासनाची देखील फसवणूक केल्याप्रकरणी त्यांच्यावर गंभीर गुन्हा नोंद करण्यात यावा. त्यांचे लायसन कायमस्वरूपी रद्द करण्यात यावे, या अनाधिकृत दारूच्या दुकानाविषयी काल संगमनेर शहरामध्ये अतिक्रमणाची कारवाई सुरू असताना स्थानिक नगरसेवक, नेते, पुढारी ग्रामस्थांनी प्रशासनाला घेराव घालत सदरच्या अवैध दारू दुकानाचा आपण त्वरित बंदोबस्त करून अवैध दाखले देऊन वर्दळीच्या व स्थानिकांना त्रास होईल अशा ठिकाणी टाकलेल्या दारूची दुकान बंद करण्याची मागणी करण्यात आली.
या देशी दारू दुकानाविरोधात सामाजिक कार्यकर्त्या बानोबी शेख यांच्यासह सहकाऱ्यांनी तब्बल एक वर्षापासून योग्य पाठपुराव्याची लढाई सुरू ठेवली आहे, आता या संदर्भात दारूबंदी विभाग जिल्हा अधीक्षक अहिल्यानगर, संगमनेर नगरपालिका मुख्याधिकारी, शहर पोलीस निरीक्षक आणि संगमनेरचे उपविभागीय पोलीस अधिकारी यांना आमरण उपोषणाचे निवेदन देऊन उग्र आंदोलनाचा इशारा देण्यात आलेला आहे.
