संगमनेर, दि. १५ फेब्रुवारी – प्रतिनिधी
संगमनेरमध्ये मोठ्या प्रमाणात गोवंश जनावरांची बेकायदेशीर कत्तलखान्याच्या माध्यमातून कत्तल केली जाते. येथील कत्तलखाने देशाच्या बहुतांश भागात प्रसिद्ध आहे. वारंवार कारवाया करून देखील पोलिसांसह नगरपालिका प्रशासनाला हे कत्तलखाने बंद करण्यात यश आले नाही. त्यामुळे कत्तलीसाठी दररोज मोठ्या प्रमाणात गोवंश जनावरांची ने-आण केली जाते. गुरुवारी (१३ फेब्रुवारी) अशाच काही गोवंश जनावरांची पीकअपमधून संगमनेर तालुक्यातील पठार भागात असणाऱ्या खालची माहुली या गावाच्या शिवारात पुणे-नाशिक महामार्गावर साईबाबा मंदिरासमोर सहा वाहनांमध्ये गोवंश जनावरे यामध्ये गाया, वासरे चारा पाण्याविना दाटीवाटीने बांधून भरून घेऊन जात असताना आढळून आले.
बजरंग दलाचे कार्यकर्ते रोशन रमेश कवडे (रा. जवळे बाळेश्वर, ता. संगमनेर), ऋषिकेश सखाराम भोर आणि दादाभाऊ अण्णा खरात यांनी या गाड्या अडविल्या आणि संबंधितांवर घारगाव पोलिसांनी कारवाई करावी म्हणून पोलिसांना कळविले.
त्यानंतर याप्रकारे घारगाव पोलिसांनी सर्व मुद्देमाल ताब्यात घेत गुन्हा दाखल केला असून जनावरांनी भरलेल्या सहा पिकअप व इतर गाड्या ताब्यात घेतल्या.
याप्रकरणी फारुख युसुफ सय्यद (रा. अलकानगर, संगमनेर), शहाबाज अजिज शेख (रा. कुरण रोड, संगमनेर), शब्बीर शेख (रा. संगमनेर खुर्द, संगमनेर), संतोष सखाराम भिसे (रा. डिग्रज, ता. संगमनेर), मोबीन शेखलाल शेख (रा. मदिनानगर, संगमनेर), साद शफिक शेख (रा. संगमनेर खुर्द, संगमनेर), अजीज छोटू शेख (रा. संगमनेर खुर्द, संगमनेर), अजय सुरेश शिंदे (हिवरेतरफे, नारायणगाव), अजहर मोईन शेख (रा. संगमनेर खुर्द, संगमनेर) व माणिक बाळू मोरे (रा. डिग्रस, ता. संगमनेर) अशा दहा जणांवर रोशन रमेश कवडे यांच्या फिर्यादीवरून प्राण्यांचा छळ प्रतिबंधक अधिनियम अन्वये कलम ११, ३ नुसार गुन्हा दाखल केला असून पोलीस पुढील तपास करत आहे.
