अहिल्यानगर –
अहिल्यानगर जिल्ह्यात महिलांवरील अत्याचाराच्या घटनांमध्ये वाढ होत असताना, आता एक अत्यंत धक्कादायक आणि घृणास्पद प्रकार समोर आला आहे. एका व्यक्तीने आपल्या पत्नीला गुंगीचे औषध देऊन तिला परपुरुषांशी संबंध ठेवण्यास भाग पाडल्याचा आरोप आहे. या प्रकरणी पोलिसांनी लोणी येथील एका व्यक्तीला ताब्यात घेतले आहे.
पीडित महिलेने (वय २९) दिलेल्या फिर्यादीनुसार, २०१४ मध्ये विवाह झाल्यानंतर सुरुवातीचे काही महिने ठीक होते. मात्र, त्यानंतर पतीने तिला मारहाण आणि शिवीगाळ करण्यास सुरुवात केली. सासू आणि सासरे यांनीही तिला वाईट वागणूक दिली. दीड वर्षांपूर्वी तिला लोणी येथे एका बंगल्यावर नेण्यात आले, जिथे एका अनोळखी व्यक्तीने तिच्यासोबत बळजबरीने शरीरसंबंध केले. या कृत्याची वाच्यता केल्यास फोटो व्हायरल करण्याची धमकीही दिली. महिलेने सांगितले की, हे सर्व तिच्या नकळत गुंगीच्या गोळ्या देऊन करण्यात आले.
या महिलेला वेगवेगळ्या ठिकाणी नेऊन तिच्या पतीच्या मित्रांनी तिच्यावर अत्याचार केल्याचा आरोप आहे. काही दिवसांपूर्वी श्रीरामपूर येथे एका दुकानाच्या पाठीमागे, तर काही महिन्यांपूर्वी छत्रपती संभाजीनगर येथे एका व्यक्तीच्या घरी तिला नेऊन तिच्यासोबत गैरवर्तन करण्यात आले. एवढेच नव्हे, तर काही दिवसांपूर्वी श्रीरामपुरातील एका लॉजवर तिला गंगापूर येथील एका जोडप्यासोबत अदलाबदल करून संबंध ठेवण्यास भाग पाडल्याचा आरोप महिलेने केला आहे. यापूर्वीही अनेकदा पतीने तिला चहामध्ये औषध देऊन तिच्यावर अत्याचार केले.
या गंभीर घटनेमुळे श्रीरामपूरमध्ये खळबळ उडाली असून नागरिकांकडून तीव्र संताप व्यक्त होत आहे. पोलिसांनी या प्रकरणाचा अधिक तपास सुरू केला आहे.
