शिर्डी, दि. २ एप्रिल –
शिर्डीत शनिवारपासून (दि. ५) ते सोमवार (दि. ७) या काळात श्री साईबाबा संस्थानतर्फे ११४ वा श्रीरामनवमी उत्सव साजरा होणार आहे. या उत्सवाची तयारी पूर्ण झाली असून, १ लाख ७३ हजार भक्तमंडळ सभासदांना निमंत्रण पाठवण्यात आले आहे.
या उत्सवात मुंबईच्या व्दारकामाई मंडळाने श्री गजमुख गणपतीचा देखावा सादर केला असून, मंदिर परिसरात आकर्षक विद्युत रोषणाई करण्यात आली आहे. सौदी अरेबियातील एका साईभक्ताने फुलांची सजावट केली आहे. उत्सव काळात विविध धार्मिक व सांस्कृतिक कार्यक्रमांचे आयोजन करण्यात आले आहे.
श्री साईबाबा संस्थानचे मुख्य कार्यकारी अधिकारी गोरक्ष गाडीलकर यांनी दिलेल्या माहितीनुसार, या उत्सवात विविध ठिकाणच्या ८७ पालख्या सहभागी होणार आहेत. भक्तांच्या सोयीसाठी मंदिर परिसरात मंडप उभारण्यात आले असून, अतिरिक्त निवास व्यवस्था करण्यात आली आहे. मुंबई ते शिर्डी महामार्गावर पदयात्रींच्या निवाऱ्याची सोय करण्यात आली असून, शिर्डीत साई धर्मशाळेत नाममात्र दरात निवासाची व्यवस्था करण्यात आली आहे.
उत्सवकाळात श्री साई प्रसादालयात अंदाजे २ लाख भाविक प्रसाद भोजन घेतील, असा अंदाज आहे. लाडू पॅकेटसाठी १८० क्विंटल बुंदी आणि लाडू प्रसाद तयार करण्यात येणार आहे. श्रीरामनवमी उत्सव यशस्वीपणे पार पाडण्यासाठी तदर्थ समितीचे अध्यक्ष, जिल्हाधिकारी आणि संस्थानचे अधिकारी व कर्मचारी प्रयत्नशील आहेत.
