शिर्डी (अहमदनगर) दि. ५ एप्रिल –
एकीकडे शिर्डीमध्ये रामनवमीच्या उत्सवाला मोठ्या उत्साहात प्रारंभ झाला असताना, दुसरीकडे एका धक्कादायक घटनेने शहरात खळबळ उडाली आहे. शिर्डी विमानतळाजवळील काकडी शिवारातील गुंजाळवस्ती येथे अज्ञात व्यक्तींनी दोघांची निर्घृण हत्या केली आहे, तर एक महिला गंभीर जखमी झाली आहे. प्राथमिक माहितीनुसार, हा हल्ला दरोड्याच्या उद्देशाने झाला असावा, अशी शक्यता वर्तवण्यात येत आहे.
या दुर्दैवी घटनेत साहेबराव भोसले (वय ६०) आणि त्यांचे पुत्र कृष्णा भोसले (वय ३०) यांचा मृत्यू झाला आहे. साहेबराव यांची पत्नी या हल्ल्यात गंभीर जखमी झाल्या असून त्यांच्यावर रुग्णालयात उपचार सुरू आहेत.
पोलिसांनी दिलेल्या माहितीनुसार, ही घटना शनिवारी पहाटेच्या सुमारास घडली. हल्लेखोरांनी घरात प्रवेश करून धारदार शस्त्राने हल्ला केला. घरात सामान अस्तव्यस्त पडलेले आढळल्याने दरोड्याच्या शक्यतेला बळ मिळत आहे.
घटनेची माहिती मिळताच वरिष्ठ पोलीस अधिकारी तातडीने घटनास्थळी दाखल झाले आणि त्यांनी तपासाला सुरुवात केली आहे. हत्येचे नेमके कारण अद्याप स्पष्ट झालेले नाही, परंतु पोलीस सर्व शक्यतांचा विचार करून कसून तपास करत आहेत.
रामनवमीच्या पवित्र वातावरणात घडलेल्या या दुहेरी हत्याकांडाने शिर्डी परिसरात शोक आणि भीतीचे वातावरण पसरले आहे. पोलीस लवकरात लवकर आरोपींना पकडण्यासाठी प्रयत्नशील आहेत.
