संगमनेर, दि. ७ एप्रिल – विलास गुंजाळ
शिर्डीहून साईबाबांचे दर्शन घेऊन नारायणगावकडे परतणाऱ्या भाविकांच्या टेम्पोला सायंकाळी सहाच्या सुमारास नाशिक-पुणे महामार्गावर डोळासणे उड्डाणपुलाजवळ एका ट्रकने जोरदार धडक दिली.
या दुर्घटनेत नारायणगाव येथील सचिन पांडुरंग दरेकर या साईभक्ताचा जागीच मृत्यू झाला, तर आशा नागनाथ दराडे (वय ५५) आणि अश्विनी शिवाजी बोराडे (वय ४५) या दोन महिला गंभीर जखमी झाल्या आहेत. दोघीही नारायणगाव (ता. जुन्नर, जि. पुणे) येथील रहिवासी आहेत.
मिळालेल्या माहितीनुसार, भाविक (एम एच १४ जी यु २६४४) क्रमांकाच्या टेम्पोमधून शिर्डीहून दर्शनानंतर आपल्या गावी परतत होते. डोळासणे उड्डाणपुलाच्या उतारावर, रस्त्याच्या कडेला पाणी पिण्यासाठी टेम्पो थांबला असताना, नाशिकहून पुण्याकडे जाणाऱ्या (एम एच १५ ई जी ३०५५) क्रमांकाच्या ट्रकने टेम्पोला मागून जबर धडक दिली.
अपघाताची माहिती मिळताच डोळासणे महामार्ग पोलीस मदत केंद्राचे पोलीस उपनिरीक्षक बाबासाहेब सांगळे आपल्या सहकाऱ्यांसह तातडीने घटनास्थळी दाखल झाले. त्यांनी रुग्णवाहिकेला बोलावून जखमी महिलांना तत्काळ घारगाव येथील एका खासगी रुग्णालयात उपचारासाठी दाखल केले. मृतदेह शवविच्छेदनासाठी घुलेवाडी येथील ग्रामीण रुग्णालयात पाठवण्यात आला आहे.
पोलिसांनी ट्रक चालक संतोष नामदेव हुलवळे (वय ४२, रा. वाघापूर, ता. अकोले) याला ताब्यात घेतले आहे. रात्री उशिरापर्यंत घारगाव पोलीस ठाण्यात या अपघाताची नोंद करण्याची प्रक्रिया सुरू होती.
