संगमनेर, दि. ८ एप्रिल – प्रतिनिधी
सहकार महर्षी भाऊसाहेब थोरात सहकारी साखर कारखान्याच्या निवडणुकीच्या रणधुमाळीने चांगलाच वेग घेतला आहे. उद्या (९ एप्रिल) उमेदवारी अर्ज दाखल करण्याची अंतिम मुदत असल्याने आज दिवसभर इच्छुकांनी मोठ्या संख्येने अर्ज दाखल केले. विशेष म्हणजे, या निवडणुकीत विरोधकांनी देखील सक्रिय सहभाग दर्शविला असून, विद्यमान संचालकांनीही आपले अर्ज भरले आहेत.
उद्या सत्ताधारी आणि विरोधक यांच्याकडून आणखी मोठ्या प्रमाणात अर्ज दाखल होण्याची शक्यता वर्तवली जात आहे. त्यामुळे उमेदवारी अर्ज माघारी घेतल्यानंतरच निवडणुकीचे खरे चित्र स्पष्ट होणार आहे. दरम्यान, दाखल झालेल्या अर्जांची छाननी ११ एप्रिल रोजी होणार आहे.
या निवडणुकीत राज्याचे मंत्री तथा जिल्ह्याचे पालकमंत्री राधाकृष्ण विखे पाटील आणि संगमनेरचे नवनियुक्त आमदार अमोल खताळ यांच्या माध्यमातून विरोधक उमेदवार उभे करणार असल्याने, निवडणुकीत चांगलीच चुरस निर्माण होण्याची शक्यता आहे. यापूर्वी थोरात यांच्या नेतृत्वाखाली कारखान्याच्या निवडणुका सहसा बिनविरोध होत आल्या आहेत. मात्र, यावेळेस बिनविरोध निवडणुकीची शक्यता मावळली असून, अनेक उमेदवार निवडणुकीच्या रिंगणात उतरण्याची तयारी करत आहेत. आत्तापर्यंत महिला मतदार संघ वगळता इतर सर्व मतदारसंघांमध्ये इच्छुकांनी आपले उमेदवारी अर्ज दाखल केले आहेत.
निवडणूक निर्णय अधिकारी तथा संगमनेरचे प्रांताधिकारी शैलेश हिंगे यांनी दिलेल्या माहितीनुसार, आजपर्यंत दाखल झालेल्या उमेदवारी अर्जांची गटनिहाय आकडेवारी खालीलप्रमाणे आहे:
यांनी दाखल केले उमेदवारी अर्ज…
साकुर गट – थोरात बाळासाहेब भाऊसाहेब, थोरात इंद्रजीत पंडितराव, वर्पे मीनानाथ गोपीनाथ, खेमनर इंद्रजीत अशोकराव,
जोर्वे गट – थोरात बाळासाहेब भाऊसाहेब, शेजुळ रामदास मुरलीधर, शिंदे पुंजाहारी तुकाराम, साबळे कारभारी भिका, दिघे गणपत उमाजी, दिघे दिनकर विठोबा, खुळे दत्तात्रय निवृत्ती, थोरात इंद्रजीत पंडितराव, शिंदे बाबासाहेब गजाबा,
तळेगाव गट – गोडगे संपतराव श्रीरंगराव, विलास रामराव, भोकनळ रवींद्र दगडू, कुटे रामनाथ बाळाजी,
धांदरफळ गट – ठकाजी नारायण कानवडे, घुले पांडुरंग दामोधर, ठकाजी नारायण कानवडे, रहाणे विजय रामनाथ, घुले पांडुरंग दामोधर, कासार विवेक विठ्ठल, गुंजाळ रमेश लहानुभाऊ, गुंजाळ रमेश लहानुभाऊ, भोकनळ रवींद्र दगडू
अकोले-जवळे गट – कडलग चंद्रकांत भिकाजी, देशमुख गुलाब सयाजी, देशमुख कैलास अण्णासाहेब, हासे माधव रामभाऊ
उत्पादक सहकारी संस्था, बिगर उत्पादक संस्था व पणन संस्था गटातून – थोरात बाळासाहेब भाऊसाहेब, थोरात विजय उर्फ बाळासाहेब भाऊसाहेब
अनुसूचित जाती /अनुसूचित जमाती प्रतिनिधी गटातून – गंगाराम राधू वाकचौरे,
महिला प्रतिनिधी मतदार संघ – निरंक
इतर मागासवर्ग मतदार संघ – डाके धनंजय अशोकराव, अभंग सुदाम दत्तात्रय, खुळे दत्तात्रय निवृत्ती, ताजने अंकुश बाळासाहेब
भटक्या विमुक्त जाती व जमाती, विशेष मागास प्रवर्ग मतदार संघ – शिंदे पुंजाहारी तुकाराम, भाबड बंडू दामू, खेमनर इंद्रजीत अशोकराव
