‘गोकुळ’वर बंटी पाटलांचाच गुलाल! महायुतीचा सुफडा साफ; हसन मुश्रीफांच्या मुलासह दिग्गज ‘आऊट’, अजिंक्यतारावर दसऱ्याआधीच दिवाळी!

महाराष्ट्र संवाद न्यूज ऑनलाईन-
राज्याच्या सहकार वर्तुळाचे लक्ष लागून राहिलेल्या कोल्हापूरच्या राजर्षी शाहू छत्रपती सहकारी दूध उत्पादक संघाच्या (गोकुळ) अत्यंत अतिसंवेदनशील आणि चुरशीच्या निवडणुकीत काँग्रेसचे विधान परिषदेचे गटनेते सतेज पाटील यांनी महायुतीचा गड उद्ध्वस्त करत मोठा विजय मिळवला आहे.
राजकीय प्रतिष्ठा आणि सत्तेचा प्रचंड जोर पणाला लागलेल्या या महासंग्रामात विरोधी राजर्षी शाहू शेतकरी समविचारी आघाडीने २५ पैकी तब्बल १६ जागांवर दणदणीत विजय मिळवत गोकुळवर आपले वर्चस्व प्रस्थापित केले. तर राज्यातील सत्तेची नशा दाखवणाऱ्या महायुती प्रणित राजर्षी शाहू विकास आघाडीला अवघ्या ९ जागांवरच समाधान मानावे लागले असून, या निकालामुळे महायुतीचे कोल्हापुरात पानिपत झाले आहे.
राज्यातील सहकार क्षेत्रातील या सर्वात मोठ्या निवडणुकीत मुख्यमंत्र्यांपासून ते महायुतीच्या तमाम मंत्र्यांनी आणि स्थानिक नेत्यांनी प्रचाराची राळ उठवली होती. सत्तेचा गैरवापर करत विरोधकांना नामोहरम करण्याचे प्रयत्न झाले. मात्र, या सगळ्या विरोधात काँग्रेसचे आमदार सतेज पाटील यांनी एकहाती किल्ला लढवत तगडी प्रचार यंत्रणा राबवली. मतमोजणीच्या सुरुवातीला महायुतीने काहीशी आघाडी घेतली होती, परंतु दुपारनंतर चित्र पालटले आणि समविचारी आघाडीने असा काही दणका दिला की सत्ताधाऱ्यांचे पायखालची जमीनच सरकली.
या निवडणुकीतील सर्वात मोठा धक्का म्हणजे गोकुळचे साम्राज्य चालवणारे महायुतीचे शिलेदार आणि मंत्री हसन मुश्रीफ यांचे चिरंजीव, मावळते अध्यक्ष नविद मुश्रीफ यांना ओबीसी गटातून समविचारी आघाडीच्या शशिकांत खोत यांनी ६९ मतांनी पराभवाची धूळ चारली. त्यांच्यासह गोकुळचे माजी अध्यक्ष अरुण डोंगळे आणि विश्वास पाटील या दिग्गजांनाही मतदारांनी घरी पाठवले. गतवेळी विरोधी आघाडीची धुरा सांभाळणाऱ्या शौमिका महाडिक यांचा अवघ्या ७ मतांनी झालेला नाट्यमय पराभव हा या निवडणुकीचा सर्वात मोठा टर्निंग पॉईंट ठरला.
दरम्यान, मतदारांवर दबाव आणण्यासाठी आणि मतदान एकनिष्ठ राखण्यासाठी यल्लमा, रेणुका, बाळूमामा यांसारख्या देवतांच्या नावाने शपथा घालण्याचे प्रकार घडले. भंडाऱ्याची राख, देवाचे अरिष्ट आणि जाडजुड पाकिटांच्या प्रलोभनांना ठरावधारकांनी सणसणीत चपराक देत स्वाभिमानाशी तडजोड केली नाही, हे या निकालावरून स्पष्ट झाले आहे.
निकालाचे चित्र स्पष्ट होताच महायुतीच्या नेत्यांचे चेहरे हिरमुसले झाले, तर सतेज पाटील यांच्या ‘अजिंक्यतारा’ जनसंपर्क कार्यालयाबाहेर जणू दसऱ्याआधीच दिवाळी अवतरली. हजारो दूध उत्पादक शेतकरी आणि तरुण कार्यकर्त्यांनी ढोल-ताशांच्या गजरात सतेज पाटलांना खांद्यावर घेतले. गुलालाची उधळण आणि फटाक्यांची आतषबाजी करत ‘गोकुळचा बाप शेतकरी हाय’ आणि ‘कैवारी बंटी साहेब’च्या जोरदार घोषणांनी कोल्हापूरचा आसमंत दणाणून सोडला. फेरमतमोजणीचे नाट्य संपल्यानंतर झालेला हा जल्लोष विजयाची स्वाक्षरी ठरला असून, आता गोकुळच्या दूधगंगेतून सत्तांतराचा एक नवा आणि स्वच्छ प्रवाह वाहणार हे निश्चित झाले आहे.
या निवडणुकीत विजयी झालेले शिलेदार:
राजर्षी शाहू शेतकरी समविचारी आघाडी: शशिकांत पाटील चुयेकर, बाबासाहेब श्रीपती चौगुले, अभिजित प्रभाकर तायशेटे, किसन बापूसो चौगुले, राहुल बजरंग देसाई, बाबासाहेब विष्णू देवकर, विश्वजित दिनकरराव जाधव, विद्याधर बाबूराव गुरबे, सचिन दौलतराव घोरपडे, अंजना केदारी रेडेकर, भाग्यश्री धीरज डोंगळे, शशिकांत शामराव खोत, राजु जयवंतराव आवळे आणि बयाजी देवू शेळके.
महायुतीची राजर्षी शाहू विकास आघाडी: राजेश नरसिंगराव पाटील, राहुल पी. पाटील, रणजित के. पाटील, रणजित दिलीप पाटील, अंबरिशसिंह संजय घाटगे, चेतन अरुण नरके, अजित शशिकांत नरके, अजित पांडुरंग पाटील आणि वीरेंद्र संजय मंडलिक.