संगमनेर, दि. १३ एप्रिल – प्रतिनिधी
सहकार महर्षी भाऊसाहेब थोरात सहकारी साखर कारखाना निवडणुकीसाठी दाखल झालेल्या १३३ उमेदवारांच्या अर्जांची छाननी प्रक्रिया पूर्ण झाली असून एका अर्जावरील प्रलंबित निर्णय आता मंगळवारी (दि. १५) होणार आहे. निवडणूक कार्यक्रमानुसार छाननी शुक्रवारी (दि. ११) पार पडली. परंतु चार अर्जांवर हरकती आल्यामुळे त्या सदर्भात निर्णय घेण्यात आला असून एका उमेदवाराच्या अर्जावरील निर्णय प्रलंबित असल्याने तो मंगळवारी दिला जाणार असल्याची माहिती निवडणूक निर्णय अधिकारी तथा प्रांत अधिकारी शैलेश हिंगे यांनी दिली.
थोरात कारखान्याच्या निवडणुकीतून विरोधकांनी माघार घेतल्यामुळे ही निवडणूक बिनविरोध करण्यासाठी सध्या प्रयत्न सुरू आहेत. अर्ज दाखल करण्याच्या अंतिम मुदतीत एकूण १३३ उमेदवारांनी अर्ज दाखल केले होते. यापैकी काही उमेदवारांनी एकापेक्षा जास्त अर्ज दाखल केल्यामुळे अर्जांची संख्या वाढली आहे.
शुक्रवारी छाननी होणार असल्याची माहिती निवडणूक कार्यक्रमाद्वारे देण्यात आली होती, काही उमेदवारी अर्जांवर हरकती आल्यामुळे मात्र रात्री उशिरापर्यंत निवडणूक अधिकाऱ्यांकडून कोणतीही अधिकृत माहिती न मिळाल्याने उत्सुकता वाढली होती. शनिवारी निवडणूक निर्णय अधिकारी शैलेश हिंगे यांच्याशी संपर्क साधल्यावर त्यांनी चार अर्जांवर हरकती आल्याची व त्यापैकी एका अर्जावरील निर्णयासाठी मंगळवारची वेळ दिली असल्याचे ‘महाराष्ट्र संवाद’शी बोलताना सांगितले.
तसेच, शनिवार, रविवार आणि सोमवार या सलग तीन दिवसांच्या सुट्ट्यांमुळे छाननी आणि त्यावरील निर्णय प्रक्रिया लांबली आहे.
आता पार पडलेल्या छाननी संदर्भातील संपूर्ण माहिती मंगळवारी समोर येणार असून, त्यानंतरच निवडणुकीचे चित्र स्पष्ट होणार आहे. नियमानुसार काम करण्याची जबाबदारी निवडणूक निर्णय अधिकाऱ्यांची असली तरी, सभा झालेल्या सुट्ट्यांमुळे छाननीबाबत निर्णय लांबल्याने सध्या हा विषय चर्चेचा बनला आहे. आता मंगळवारी कोणाकोणाचे अर्ज बाद ठरतात, याकडे संपूर्ण तालुक्याचे लक्ष लागलेले आहे.
