महाराष्ट्र संवाद न्यूज – अकोले
राज्य उत्पादन शुल्क विभागाने आज (०३ मे) अकोले तालुक्यात अवैध मद्य विक्री करणाऱ्या केंद्रांवर मोठी कारवाई केली आहे. श्रीरामपूर येथील भरारी पथक क्र. २ आणि संगमनेर विभागाच्या संयुक्त पथकाने केलेल्या या धडक कारवाईत सात ठिकाणी गुन्हे दाखल करण्यात आले असून १ लाख ९ हजार ८५० रुपयांचा मुद्देमाल जप्त करण्यात आला आहे.
कारवाई करण्यात आलेले सुनील लक्ष्मण देशमुख, विक्रम अशोक घाटकर, राहुल अदालतनाथ शुक्ला, किसन सुरेश चोथवे, दत्तात्रेय दशरथ भालेराव, मुनीर जलाउद्दीन शेख आणि विकी ज्ञानदेव रहाणे (सर्व आरोपी रा. राजूर ता. अकोले, जि. अहिल्यानगर) येथील रहिवासी आहेत.
राज्य उत्पादन शुल्क विभागाच्या पथकाने हिवरगाव आंबरे, विरगाव फाटा, तांभोळ, निळवंडे, निंब्रळ आणि राजूर या गावांमध्ये अवैध मद्य विक्रीची केंद्रे आणि ढाब्यांवर छापे टाकले. या कारवाईत एकूण २५८.१२ बल्क लिटर देशी दारू आणि १०.२६ बल्क लिटर विदेशी दारू जप्त करण्यात आली. जप्त केलेल्या मुद्देमालाची एकूण किंमत १ लाख ९ हजार ८५० रुपये आहे. याप्रकरणी महाराष्ट्र दारूबंदी अधिनियम १९४९ अंतर्गत वरील सर्व सातही आरोपींविरुद्ध गुन्हे दाखल करण्यात आले आहेत. सागर धोमकर (विभागीय उपआयुक्त, राज्य उत्पादन शुल्क, पुणे विभाग, पुणे), प्रमोद सोनोने (अधीक्षक, राज्य उत्पादन शुल्क, अहिल्यानगर), प्रवीणकुमार तेली (उपअधीक्षक, राज्य उत्पादन शुल्क, अहिल्यानगर) यांच्या मार्गदर्शनाखाली ही यशस्वी कारवाई पार पडली.
या कारवाईत श्रीरामपूर आणि संगमनेर येथील राज्य उत्पादन शुल्क विभागाच्या निरीक्षकांच्या पथकांचा सक्रिय सहभाग होता. राज्य उत्पादन शुल्क विभागाने यापुढेही अवैध हातभट्टी, गावठी दारू उत्पादन, वाहतूक, विक्री ठिकाणे आणि अवैध ढाब्यांवर सतत कठोर कारवाई केली जाईल, असा इशारा दिला आहे.
