महाराष्ट्र संवाद न्यूज – संगमनेर
संगमनेर पोलिसांनी काल (०७ मे) शहरातील मदिनानगर परिसरात छापा टाकून कत्तल करण्याच्या उद्देशाने निर्दयपणे बांधून ठेवलेल्या एक लाख रुपये किमतीच्या १० गोवंश जनावरांची सुटका केली. या प्रकरणी जावेद इसाक शेख (वय २७, रा. संगमनेर खुर्द) या व्यक्तीविरुद्ध महाराष्ट्र प्राणी संरक्षण अधिनियम आणि प्राण्यांना निर्दयतेने वागवण्यास प्रतिबंधक कायद्यान्वये गुन्हा दाखल करण्यात आला आहे.
संगमनेरचे पोलीस उपअधीक्षक डॉ. कुणाल सोनवणे यांना या संदर्भात गोपनीय माहिती मिळाली होती. त्यांनी लगेचच कार्यालयातील पोलीस नाईक राहूल डोके, पोलीस कॉन्स्टेबल राहुल सारबंदे यांच्या शहर पोलीस ठाण्यातील पोलीस उपनिरीक्षक रावसाहेब लोखंडे, पोलीस कॉन्स्टेबल विशाल कर्पे यांना माहिती मिळालेल्या ठिकाणी कारवाई करण्याचे आदेश दिले होते.
उपविभागीय पोलीस अधिकारी कार्यालयात कार्यरत असलेले पोलीस नाईक राहुल डोके यांनी यासंदर्भात संगमनेर शहर पोलीस ठाण्यात दिलेल्या फिर्यादीवरून आरोपी विरोधात गुन्हा दाखल करण्यात आला आहे. फिर्यादीनुसार उपविभागीय पोलीस अधिकारी कुणाल सोनवणे यांच्या आदेशानुसार पोलीस पथकाने मदिनानगरमधील दोषिया मजिदजवळ असलेल्या पत्र्याच्या शेडवर छापा टाकला.
यावेळी पोलिसांना एका खोलीत लहान-मोठी अशी एक लाख रुपये किमतीची एकूण १० काळ्या-पांढऱ्या रंगाची गोवंश जातीची जनावरे दाटीवाटीने बांधलेली आणि कोंडलेली आढळली. त्यांना चारापाणी देण्यात आला नव्हता. त्यांची कत्तल करण्याच्या उद्देशाने त्यांना तेथे ठेवण्यात आले होते. घटनास्थळी पोलीस कारवाईत हाती लागलेल्या जावेद शेख याने ही जनावरे आपली असून कत्तल करण्यासाठी बांधल्याची कबुली दिली.
पोलिसांनी तात्काळ पंचनामा करून शेख याला ताब्यात घेतले आणि जनावरांना पुढील देखभालीसाठी संगमनेर तालुक्यातील सायखिंडी येथील जिवदया गो शाळेत पोलीस हेड कॉन्स्टेबल संतोष बाचकर यांच्या माध्यमातून पाठविण्यात आले असून पोलिसांनी महाराष्ट्र प्राणी संरक्षण अधिनियम १९७६ (सुधारित २०१५) चे कलम ५, ९ आणि प्राण्यांना निर्दयतेने वागविण्यास प्रतिबंधक अधिनियमचे कलम ३, ११ अन्वये जावेद शेख याच्या विरोधात गुन्हा दाखल केला असून, पुढील तपास पोलीस हेड कॉन्स्टेबल पारधी हे करत आहेत.
