महाराष्ट्र संवाद न्यूज – अहिल्यानगर जिल्ह्यात श्रीरामपूर पोलिसांनी मोठी कारवाई करत १३ कोटी ७५ लाख ४१ हजार रुपये किमतीचा तब्बल ४०८ किलो वजनाचा अल्प्राझोलम या अंमली पदार्थाचा साठा जप्त केला आहे. याप्रकरणी पोलिसांनी एका टेम्पो चालकाला अटक केली असून पुणे जिल्ह्यातील एका रसायन अभियंत्याविरुद्ध गुन्हा दाखल केला आहे.
पोलिसांनी मिनीनाथ विष्णू राशिनकर (वय ३८, रा. धनगरवाडी, राहाता, अहिल्यानगर) या टेम्पो चालकाला अटक केली आहे. तर, विश्वनाथ कारभारी शिपणकर (रा. दौंड, पुणे) याच्याविरुद्ध श्रीरामपूर शहर पोलीस ठाण्यात अंमली पदार्थ विरोधी कायद्यान्वये गुन्हा नोंदवण्यात आला आहे, अशी माहिती श्रीरामपूरचे उपविभागीय पोलीस अधिकारी डॉ. बसवराज शिवपुजे यांनी दिली. अहिल्यानगर जिल्ह्यात एवढ्या मोठ्या प्रमाणात अंमली पदार्थ जप्त करण्याची ही पहिलीच घटना आहे.
यासंदर्भात माहिती अशी की, श्रीरामपूर एमआयडीसी परिसरात एका लहान टेम्पोमधून अंमली पदार्थांची वाहतूक होणार असल्याची गुप्त माहिती मिळाली होती. त्यानुसार, पोलीस निरीक्षक नितीन देशमुख यांच्या नेतृत्वाखाली पथकाला शोध घेण्यासाठी सूचना देण्यात आल्या. बुधवारी सायंकाळी पथकाने श्रीरामपूर एमआयडीसी आणि परिसरातील गावांमध्ये शोध मोहीम राबवली. त्यावेळी दिघी-खंडाळा रस्त्यावर एक छोटा हत्ती टेम्पो (एमएच २० बीटी ९५१) दिघीच्या दिशेने जाताना आढळला. पोलिसांनी या टेम्पोची तपासणी केली असता, त्यामध्ये १४ गोण्यांमध्ये पावडर आणि उर्वरित ७ गोण्यांमध्ये स्फटिकसदृश्य पदार्थ आढळून आले.”
पोलिसांनी टेम्पो चालक राशिनकर याची चौकशी केली असता, हे स्फटिक अल्प्राझोलम नावाचे औषध आहे आणि गोण्यांमधील पांढरी पावडर याच अल्प्राझोलमच्या निर्मितीसाठी लागणारा कच्चा माल असल्याचे त्याने पोलिसांना सांगितले.
अल्प्राझोलम हा अंमली पदार्थ असल्याने पोलिसांनी खात्री करण्यासाठी तातडीने अहिल्यानगर येथील न्यायवैद्यक तज्ज्ञांशी संपर्क साधला आणि त्यांना घटनास्थळी बोलावले. फॉरेन्सिक पथकाने केलेल्या प्राथमिक तपासणीत गोण्यांमधील पावडर आणि स्फटिक हे अल्प्राझोलम आणि त्याचा कच्चा माल असल्याचे स्पष्ट झाले.
पोलिसांनी एकूण ६ कोटी ९७ लाख ६७ हजार रुपये किमतीचे ६९ किलो ७६७ ग्रॅम वजनाचे अल्प्राझोलमचे स्फटिक (७ गोण्या) आणि ६ कोटी ७६ लाख ७४ हजार रुपये किमतीचे ३३८ किलो ३७ ग्रॅम वजनाचे अल्प्राझोलम बनवण्याची पावडर (१४ गोण्या) जप्त केली. यासोबतच, १ लाख रुपये किमतीचा छोटा हत्ती टेम्पो असा एकूण १४ कोटी ७५ लाख ४१ हजार रुपयांचा मुद्देमाल पोलिसांनी ताब्यात घेतला आहे. पोलिसांनी टेम्पो चालक मिनीनाथ राशिनकर याच्याकडे अधिक चौकशी केली असता, त्याने हा माल विश्वनाथ शिपणकर याने दिल्याचे सांगितले.
अल्प्राझोलम हा अंमली पदार्थ म्हणून वर्गीकृत आहे आणि त्याच्या हाताळणी व वापरावर बंदी आहे. याचा उपयोग साधारणतः झोपेच्या गोळ्या बनवण्यासाठी केला जातो. पोलिसांनी आता हा माल नेमका कोठे तयार करण्यात आला, याचा तपास सुरू केला असल्याचे डॉ. शिवपुंजे यांनी म्हटले आहे. आरोपी विश्वनाथ शिपणकर यापूर्वी एका औषध कंपनीत काम करत हसण्याचे शक्यता वर्तविण्यात आली आहे. जिल्हा पोलीस अधीक्षक राकेश ओला आणि अतिरिक्त पोलीस अधीक्षक वैभव कलबुर्मे यांच्या मार्गदर्शनाखाली पोलीस निरीक्षक नितीन देशमुख, सहाय्यक निरीक्षक गणेश जाधव, उपनिरीक्षक रोशन निकम, रोहिदास ठोंबरे, दीपक मेढे, अंमलदार किरण मंडले, संपत बडे, संभाजी खरात, मच्छिंद्र कातकडे, अजित पठारे, अकबर पठाण, अजिनाथ आंधळे, राहुल पोळ यांच्या पथकाने ही यशस्वी कारवाई केली.
