महाराष्ट्र संवाद न्यूज-
१२ वीच्या सराव परीक्षेत कमी गुण मिळाल्याने वडिलांच्या मारहाणीत १७ वर्षीय मुलीचा मृत्यू झाला आहे. साधना धोंडिराम भोसले असे मृत मुलीचे नाव असून, या प्रकरणी शिक्षक असलेले तिचे वडील धोंडिराम भगवान भोसले यांना खून प्रकरणी अटक करण्यात आली आहे.
पोलिसांनी दिलेल्या माहितीनुसार, नेलकरंजी येथील माध्यमिक विद्यालयात शिक्षक असलेले धोंडिराम भोसले यांची मुलगी साधना १० वी मध्ये ९२.६०% गुण मिळवून शाळेत पहिली आली होती. तिला डॉक्टर बनवण्याचे कुटुंबीयांचे स्वप्न होते आणि त्यासाठी तिची खासगी शिकवणी सुरू होती. नुकत्याच झालेल्या सराव परीक्षेत कमी गुण मिळाल्याने वडील धोंडिराम चिडले होते.
शुक्रवारी रात्री (२१ जून) धोंडिराम यांनी साधनाला कमी गुणांबद्दल विचारणा केली. त्यावेळी साधनाने “पप्पा, तुम्हालाही कमीच गुण मिळत होते. तुम्ही काय कलेक्टर झालात का? शिक्षक झालाच ना?” असे उलट उत्तर दिले. यावर धोंडिराम यांचा राग अनावर झाला. त्यांनी घरात असलेल्या दगडी जात्याच्या लाकडी खुंट्याने साधनाला बेदम मारहाण केली आणि पोटात लाथाही घातल्या. पत्नीने त्यांना थांबवण्याचा प्रयत्न केला, पण त्यांनी नंतरही अनेकवेळा साधनाला मारहाण केली.
या मारहाणीत साधनाच्या डोक्याला आणि शरीराला गंभीर दुखापत झाली. ती अस्वस्थ होती, तरी तिला शनिवारी दवाखान्यात नेण्यात आले नाही. शनिवारी दुपारी घरी परतल्यावर साधना बेशुद्ध अवस्थेत आढळली. घाबरलेल्या वडिलांनी तिला सांगली येथील दवाखान्यात नेले, जिथे त्यांनी ती बाथरूममध्ये पडून जखमी झाल्याचे भासवण्याचा प्रयत्न केला. मात्र, उपचारादरम्यानच तिचा मृत्यू झाला.
शवविच्छेदनातून साधनाच्या शरीरावर मारहाणीचे अनेक व्रण आढळून आले, ज्यामुळे पोलिसांना संशय आला. चौकशीनंतर हा प्रकार उघडकीस आला. मृत मुलीची आई प्रीती भोसले यांनी आपल्या पतीविरोधात आटपाडी पोलीस ठाण्यात तक्रार दाखल केली आहे. पोलिसांनी धोंडिराम भोसले यांना अटक केली असून, त्यांना २४ जूनपर्यंत पोलीस कोठडी सुनावण्यात आली आहे.
